Galicia no Mundial de fútbol? O BNG pide o recoñecemento oficial das seleccións deportivas galegas

Os nacionalistas rexistraron unha iniciativa para que as seleccións galegas participen en torneos internacionais. 

Iago Aspas coa selección galega | Foto: RFGF

O BNG rexistrou unha iniciativa no Congreso coa que insta o recoñecemento oficial das seleccións galegas "

para poder participar en competicións de carácter internacional".

Tamén expoñen os nacionalistas "dotar" ás federacións deportivas galegas "dos medios e ferramentas xurídicas necesarias" para acceder a ese recoñecemento internacional.

A organización critica a actitude do Goberno central "ao non realizar ningunha acción para que se recoñeza de maneira oficial o labor das seleccións galegas".

"O tecido deportivo galego conta hoxe cun alto nivel que compite e logra premios tanto a nivel estatal como no marco internacional na maior parte das disciplinas. Ademais, en casos como o fútbol galego, conta coa súa propia selección xogando en campionatos europeos e mundiais en que consegue importantes galardóns", relata o Bloque.

Neste sentido, a formación afirma "non entender como é posible que o Goberno continúe poñendo trabas para que as seleccións galegas poidan competir de maneira oficial nos campionatos de carácter internacional".

O deputado Néstor Rego apunta que "outras nacións sen estado están a facelo" e cita a Escocia, Gales e ata territorios como Xibraltar. "Nin a lexislación española nin a europea prohiben a oficialidade internacional das seleccións deportivas de nacións sen Estado", asegura.