Suspensión de toda actividade non esencial e pecha toda a hostalería en Arteixo, Viveiro e Xinzo

A Xunta explica esta mañá as novas medidas adoptadas porel SERGAS contra o coronavirus. O máis novo é a adopción de medidas nunca vistas desde a primeira onda nalgúns municipios  con "valores especialmente altos". 

O SERGAS ten unha  "preocupación especial" por concellos de moita poboación con incidencias por encima de 1.000 casos por cada 100.000 habitantes en dúas semanas e que, ademais, non son rurais, senón que teñen máis de 10.000 habitantes.

ARGUMENTOS DA XUNTA

Sanidade lembra que o valor para empezar a impoñer restricións é de 250, segundo o pactado entre Estado e Autonomía. Son municipios que, por tanto, cuadriplican ese límite.

Ante estas cifras, a Xunta crea un novo nivel de restricións, máis duro mesmo que o "nivel máximo" de anteriores medidas, e que se segue aplicando a máis municipios,  xa son 116 en total, incluídas todas as cidades, salvo Lugo, aínda que Lugo tamén segue perimetrada.

Os tres concellos afectados por este novo nivel de restricións, que podemos definir por agora como nivel extremo e que a xunta chama "modelo Carballiño" (pois similar ao aplicado nesa vila no verán), son Arteixo, Viveiro e Xinzo. En que consiste estas novas limitacións?

"Peche completo da hostalería e a suspensión de toda actividade non esencial" resumiu o conselleiro Julio Fernández Comesaña na rolda de prensa que está a dar agora mesmo. 

O principal foco das novas medidas é o peche completo da hostalería, só poderá prestar o servizo de recollida e entrega a domicilio, explicou o secretario da Consellería. Neses tres municipios deberán pechar ximnasios, cancelarse todos os espectáculos públicos, bibliotecas, locais de xogo e outros lugares de uso común. 

O conselleiro Julio Fernández Comesaña en rolda de prensa

LIMITACIÓNS EXTREMAS PODEN CHEGAR A MÁIS MUNICIPIOS

Sanidade dixo que Arteixo pasou dunha incidencia acumulada en dúas semanas duns 500 a máis de 1.300, na última semana. Viveiro sumou 100 casos nesta semana e ten unha incidencia acumulada de máis de 1.100. Xinzo pasou de 105 casos en 14 días a 193 hoxe, cunha incidencia acumulada de case 2.000. 

A creación deste novo nivel de restricións é moi importante. Non xa para as limitacións que supoñen para os habitantes desas tres vilas. Tamén porque indica que lle espera ao resto de galegos nos próximos días de seguir crecendo a pandemia. O conselleiro deixou claro que se aplicarán estas restricións a todos os municipios de máis de 10.000 habitantes que superen a incidencia acumulada de 1.000 positivos por cada 100.000 habitantes en dúas semanas. Hai matices, por exemplo Tui supera estes límites, pero é en parte debido a un brote nunha residencia, polo que por agora non está no grupo de máximas restricións.

O conselleiro puxo especial énfase nas terrazas. A Xunta quéixase de que moitos non cumpren a limitación do 50%, limitación que debe ser visible a primeira ollada inutilizando a metade das mesas. A Xunta adianta que haberá máis limitacións para os vestiarios dos ximnasios. 

SITUACIÓN NOS HOSPITAIS

Comesaña adianta que é demasiado pronto para ver os resultados das medidas adoptadas fai catro días. O mandatario asegura que a situación nos hospitais aínda non está tan mala como na primeira onda, pero hai "un crecemento rápido que nos preocupa". Agora mesmo, en camas convencionais, Galicia está a un 30 por cento do máximo da primavera.

"A poboación ten que ser cómplice dos sanitarios, senón imos por mal camiño. Esta onda pode ser bastante peor que a primeira"

Uno dos expertos, o doutor Vázquez Lima do Hospital do Salnés, explicou que o número R agora mesmo está no 1,4. É dicir, a pandemia segue crecendo. "A poboación ten que ser cómplice dos sanitarios, senón imos por mal camiño", advertiu o galeno. "Esta onda pode ser bastante peor que a primeira", insistiu ante a situación "grave".

ENTRADA EN VIGOR

As medidas entra en vigor ás 00 horas do xoves, é dicir, na madrugada do mércores ao xoves.  

Comesaña insistiu en que Galicia está a favor no adianto do toque de queda, polémica cuestión que debaterán autonomías e Ministerio esta semana. O SERGAS xa está a traballar en como organizar os horarios para impoñelos cando o Estado autoríceo, de ser necesario. En principio, a Xunta quere manter o mesmo horario para toda Galicia, como agora, que está ás 10 da noite.

Sobre a cepa británica en Galicia non hai novidades. "Só temos confirmados os oito casos" respondeu o conselleiro a Galiciapress, en referencia aos datos xa coñecidos hai varias semanas. Hai que lembrar que esta cepa é especialmente contaxiosa.