Un patinete pasa a ser considerado "un vehículo para todos os efectos", polo que xa non poderán circular polas beirarrúas

Os vehículos de mobilidade persoal, entre os que se atopan os patinetes, son considerados desde hoxe vehículos "a todos os seus efectos" e non poñerán circular polas beirarrúas, segundo sinalou a Dirección Xeral de Tráfico (DXT) nun comunicado.

Así, os seus condutores estarán sometidos ás mesmas taxas máximas de alcol permitidas pola Lei de Seguridade viaria, así como á prohibición de conducir con presenza de drogas no organismo. Tampouco poderán levar auriculares postos, nin facer uso do móbil ou de calquera outro dispositivo mentres van conducindo.

Así mesmo, teñen prohibida a circulación en vías interurbanas, travesías, autoestradas, autovías ou túneles urbanos. Estas novidades débense á entrada en vigor este sábado do Real Decreto que modifica o Regulamento Xeral de Vehículos e o Regulamento Xeral de circulación, que se aprobaron en Consello de Ministros o pasado 10 de novembro.

Segundo lembra a DXT, considérase vehículo de mobilidade persoal aquel que ten unha ou máis rodas e está dotado dunha única praza e se propulsa exclusivamente por motores eléctricos que poden proporcional ao vehículo unha velocidade máxima por deseño que oscila entre os 6 e os 25 quilómetros por hora.

Para evitar a posta en circulación de calquera artefacto nas vías públicas, os vehículos de mobilidade persoal deberán dispoñer do correspondente certificado de circulación que acredite que o vehículo cumpre cos requisitos técnicos de aplicación conforme á normativa técnica nacional e internacional.

A Dirección Xeral de Tráfico está a elaborar un manual coas características técnicas que deben cumprir estes vehículos para a súa posta en circulación, a clasificación dos mesmos, os procesos de ensaio para a súa certificación e os mecanismos que se empregarán para a súa fácil identificación. A publicación do manual por parte de Tráfico realizarase nos próximos meses.

O director xeral de Tráfico, Pere Navarro, sinalou que se realizou unha primeira regulación duns vehículos que irromperon con forza nas cidades e que forman parte do ecosistema da mobilidade urbana, "para continuar nun futuro próximo cunha nova normativa que regule máis aspectos como a idade para conducilos, o uso de casco ou de chalecos reflectores".

NOVOS LÍMITES DE VELOCIDADE

A DXT tamén apuntou que os novos límites de velocidade en vías urbanas entrarán en vigor no mes de maio. Así, limitarase a 20 quilómetros por hora a velocidade en vías que dispoñan dunha plataforma única de calzada e beirarrúa, a 30 km/h en vías dun único carril por sentido de circulación e a 50 km/h en vías de dúas ou máis carrís por sentido de circulación.

A redución da velocidade está fundamentada tanto polas novas políticas de mobilidade e seguridade viaria das cidades, no que o vehículo ten que compartir espazo e convivir con motos, bicicletas, vehículos de mobilidade persoal e peóns, como pola demanda que numerosas cidades realizaron á DXT para que realizase un cambio normativo que lles permita desenvolver adecuadamente os novos modelos de cidade.

Esta modificación, que se aprobou o pasado 10 de novembro, non entrará en vigor ata o 11 de maio para dar un período de tempo ás administracións locais a que adapten a sinalización e realicen os cambios necesarios que requiren estes límites.

Segue lendo a noticia en Catalunyapress.