Boas noticias: a menor cifra de novos positivos desde o 6 de outubro permite baixar as medias

As últimas cifras do coronavirus en Galicia son boas. A melloría leve da que Galiciapress leva varios días falando gaña cimentos. Terceiro día seguido que baixa a incidencia acumulada semanal. Ademais, o concello con máis problemas recentemente, Santiago, presenta hoxe unhas cifras esperanzadoras. O novo epicentro da pandemia en Galicia parece desprazarse á Illa de Arousa.

Así, hai que remontarse ao 6 de outubro para atopar tan poucos novos positivos como hoxe, 202. Esta cifra axuda a afundir a incidencia acumulada semanal a 83 positivos por cada 100 galegos.

Como a melloría dura xa varias xornadas, empézase a deixar ver tamén na incidencia acumulada a dúas semanas. Hoxe baixa de 163 a 162 diagnósticos por 100.000 galegos cada catorce días. 

Son caídas pequenas, pero significativas. A semanal porque encadea tres xornadas á baixa, algo inédito desde principio de decembro. A de 14 días porque é a primeira vez que cae nas últimas 11 xornadas.

Afiánzase pois un leve descenso, que tamén se ve na taxa de positividade.  O 3% de hoxe é un gran rexistro, o segundo mellor desde principios de outubro. Contribúe a manter a media móbil a sete días no 4,2%. 

NON É SÓ UN DATO PUNTUAL

Hai que ter en conta que os datos de hoxe martes proveñen na súa maioría das PCRs encargadas o domingo, o día con menos actividade. Isto explica en parte as excelentes cifras de hoxe, pero non de todo. 

Se fose só unha melloría puntual, non baixarían as medias semanais e moito menos a incidencia acumulado  a dúas semanas.

CASOS ACTIVOS ESTABILIZADOS

A cantidade de infectados non curados baixa hoxe, aínda que sexa poquísimo. Os 5.603 pacientes con infección activa son só 4 menos que onte, unha caída ínfima do 0,1%. Con todo, o importante é que a media semanal vai polo bo camiño.

O repunte de principios de mes elevou o crecemento diario hata un +0,3% de media. A leve melloría actual freouno primeiro e agora reduciuno ao 0%. É dicir, de media cada día hai o mesmo número de positivos que a suma de curacións e falecementos. 

CONCLUSIÓNS

Con todos estes datos sobre a mesa, pódese concluír:

• Tras contratacar a principios de decembro, aproveitando o desconfinamiento de Santiago e Ourense, a pandemia está a perder brío outra vez.
• O virus leva perdiende terreo unha semana, aproximadamente. Este retroceso é aínda leve e recente, pero é xa unha tendencia visible.
• En todo caso, Galicia non sufriu durante o rebote de feixes uns días un crecemento tan brusco como noutros rebotes. Isto dá esperanzas de que ese rebote non se debese a ningunha cepa especialmente contaxiosa, como a bautizada no Reino Unido.
• O nivel de restricións máis alto da Xunta está a funcionar, vistas as mellorías en lugares como Boiro. Onte o SERGAS apostou pola prundencia, ampliou esas restricións a Rianxo e deixou confinadas todas as cidades salvo Ourense.
• Agora ben, os niveis de contagios seguen sendo preocupantes, especialmente en vésperas do Nadal. De acordo a o semáforo de alertas estatal:

A incidencia acumulada a dúas semanas esta en nivel de "risco alto"

A incidencia acumulada semanal  está en nivel de "risco alto"

A taxa de positividade está en nivel de "risco baixo".

A ocupación hospitalaria está en nivel de "risco baixo"  (4% de ocupación), segundo datos do Ministerio (a Xunta non os publica).

A ocupación das UCIS está en nivel de "risco baixo" (7% de ocupación), segundo datos do Ministerio.

DATOS POR ÁREAS

Unha das mellores noticias do día é que os novos positivos modéranse moito en Santiago de Compostela. A cidade ten só dúas máis que onte. Aínda así, a área sanitaria de Compostela - O Barbanza é a segunda que máis achega, 42 de 202 positivos.

Excelentes números hoxe na Coruña, con só 10 diagnósticos.  Ourense é a que máis achega, en parte debido aos contagios detectados en San Cristovo de Cea e Pereiro de Aguiar.

Máis información en detalle sobre a evolución a nivel municipal e por áreas sanitarias nuns minutos en Galiciapress.

FALECEMENTOS

A Consellería de Sanidade sumou cinco novos falecementos relacionados coa pandemia do coronavirus en Galicia, que elevan o cómputo global a 1.346.  

Destas cinco vítimas rexistradas nas últimas horas, dúas delas ocorreron na residencia Asilo Vilalba (Lugo). En concreto, morreron neste centro dous homes de 82 e 65 anos que estaban diagnosticados de covid-19.