Empregados do Santander protestan nas rúas da Coruña e Vigo polo ERE da entidade

Protestas dos empregados do banco Santander ante o ERE anunciado pola entidade.

"Sabemos que hai traballo suficiente no banco, que non podemos seguir pechando oficinas, que aquí non sobre ninguén, e en todo caso falta unha adecuada xestión dos recursos", denuncian.

Decenas de traballadores do Banco Santander mobilizáronse este sábado na Coruña e Vigo en rexeitamento ao ERE que aplicará a compañía e que en Galicia "supoñerá a destrución de 370 empregos" e o peche doutras 79 oficinas.

A CIG advertiu que a única vía de negociación ten pasar por un acordo que garanta "unha saída digna" do colectivo afectado, a través de prexubilacións, para paliar esta "brutal agresión" que está a sufrir o persoal da entidade.

"Sabemos que hai traballo suficiente no banco, que non podemos seguir pechando oficinas, que aquí non sobre ninguén, e en todo caso falta unha adecuada xestión dos recursos", indicaron desde o sindicato.

Neste sentido, insisten en que o ERE "profunda drasticamente na reestruturación do sistema financeiro" que se rexistra nos últimos anos e instan a "frear a destrución de emprego e a perda de servizos".