O fondo francés Meridiam compra a concesionaria do Hospital Álvaro Cunqueiro de Vigo á construtora Acciona

O HAC de Vigo construíuse en parte con diñeiro privado, usando un modelo que xerou moitísima polémica. Os construtores quedaron coa prestación de servizos non sanitarios. Servizos públicos que agora cambian de donos.

Acciona vendeu o seu partipación maioritaria na concesionaria do hospital Álvaro Cunqueiro, a agrupación de empresas que forma Sociedade Concesionaria Novo Hospital de Vigo S.A., ao fondo francés de infraestruturas Meridiam, informa a multinacional na súa web.

Esta operación enmárcase nun acordo alcanzado por Acciona para vender a Meridiam e Bestinver as súas participacións en oito activos concesionales en España, que inclúen dúas autovías, catro hospitais, unha canle de auga e unha universidade, por un importe de 484 millóns de euros.

Desta cantidade, 357 millóns de euros representan o valor das participacións da compañía e 127 millóns de euros, a débeda asociada, segundo informou este luns o grupo nun comunicado.

En concreto, Acciona desprenderase das súas participacións concesionales na Autovía A-66 Roteiro da Prata (Xixón-Sevilla), a autovía CM-42 dos Viñedos (Toledo-Tomelloso), o hospital Álvaro Cunqueiro (Vigo), o Hospital de Toledo, o Hospital Can Misses (Eivissa), o Hospital Universitario Infanta Sofía (Alcobendas), a Canle de Navarra e a Facultade de Dereito da Universidade de Barcelona.

Meridiam adquirirá participacións de referencia nos oito activos, cun paquete valorado en 312 millóns de euros, mentres que Bestinver, a través do seu novo fondo de infraestruturas, tomará participacións minoritarias na autoestrada CM-42 e nos hospitais de Eivissa e Alcobendas, por 45 millóns de euros, nas mesmas condicións.

O grupo prevé pechar esta operación, suxeita a diversas autorizacións, no primeiro semestre de 2021. Antes de finalizar 2020, Acciona estima que ingresará, como pago parcial do prezo da transacción, 234 millóns de euros.

Acciona destacou que esta operación enmárcase na súa estratexia de rotar activos maduros co obxectivo de maximizar o retorno do capital empregado, continuar coa redución do endebedamento financeiro do grupo e impulsar novos investimentos, ademais de cumprir co obxectivo de venda de activos anunciado.

Crédit Agricole Corporate and Investment Bank actuou como asesor financeiro exclusivo de Acciona nesta operación.