Os bancos de alimentos empezan a 'Gran Recollida' con temor a non poder repartir en Nadal tanto como antes

Este luns 16 de novembro comeza a campaña de ‘A Gran Recollida’ dos bancos de alimentos que ao longo de toda a semana alentarán á cidadanía a que realicen as súas doazóns, xa sexa por internet ou nas caixas dos supermercados, nun momento de crise que puxo a moitas familias e a estas entidades contra as cordas.

Os bancos de alimentos de Vigo e Ourense, cuxa labor se estende a nivel provincial, atenden a Galiciapress para denunciar as dificultades ás que se enfrontan nun momento no que viron como o número de solicitudes ascendían ata un 40%, levando os seus recursos ata o límite: “Notamos unha nova clase social moi próxima ao limiar de pobreza”.

Voluntarios de 'A Gran Recollida' en anos anteriores

Como vén sendo habitual cada novembro, os bancos de alimentos se arremangan este mes para tentar animar á cidadanía para participar en ‘ A Gran Recollida’, unha campaña estatal para animar á xente para realizar donativos a estas fundacións de carácter social e sen ánimo de lucro.

Doazóns de particulares, distribuidores, empresas, cadeas de supermercados ou mesmo clubs deportivos son os que enchen os andeis destas organizacións, encargadas da xestión e repartición dos produtos. No caso do banco vigués, son xa 25 os anos que lle contemplan nun labor que agora tecen 150 colectivos sociais cos que traballan “de maneira desinteresada en toda a provincia de Pontevedra”.

“O principal obxectivo é seguir velando polo cumprimento dun dos dereitos humanos máis fundamentais e que as persoas máis desfavorecidas ven mermado: o acceso a unha alimentación suficiente, segura, saudable e gratuíta”, sinalan desde a organización olívica.

En Ourense, onde o banco colabora con 72 entidades provinciais de maneira equitativa, a actividade está totalmente a cargo delos voluntarios “que reciben os alimentos no almacén, clasifícanos por tipo e data de consumo preferente, e preparan en lotes para repartir a todas as entidades de consumo e repartición de toda a provincia de Ourense que atenden a persoas en situación de vulnerabilidade”.

“Tamén repartimos quincenalmente ou mensualmente, segundo as posibilidades de loxística ou das cooperativas que entran no Fondo Español de Garantía Agraria, programas de distribución de alimentos: Distribución de froita variada e distribución de alimentos de primeira necesidade a través do ‘Plan Nacional de axuda aos máis necesitados do Reino de España’”, engaden.

HORAS BAIXAS

Esta distribución de alimentos fíxose agora máis importante que nunca por mor da crise sanitaria, xa que unha das súas consecuencias directas foi o aumento de familias que necesitan a axuda deste tipo de entidades.

En Vigo cifran ese aumento nun 40%, o dobre da cifra que arroxan en Ourense, dun 20%, aínda que na área da cidade termal comprobaron que algunhas entidades tamén referiron un descenso no número de familias a atender, talvez “por motivo de desprazamento”. “Comezamos este 2020 atendendo a unhas 20.000 persoas en toda a provincia de Pontevedra”, esgrimen, unha cifra que agora “rolda os 30.000 beneficiarios”.

En Ourense, onde a actualización das cifras é cuadrimestral, seguen un procedemento estrito para atender ás persoas que terminarán recibindo as axudas. “A cada entidade pedímoslle que, para atender a unha persoa ou familia, deben ter un certificado dos servizos sociais e presentar os datos das familias atendidas na subdelegación de Goberno”. O fin último disto é “cotexar que non existan duplicidades con outra entidade, de tal maneira que a repartición sexa o máis xusto posible”.

Cuestionados sobre como a crise puido cambiar o perfil do beneficiario destas axudas, en Ourense din que, ao non atender directamente ás familias, non poden dar un perfil tipo, xa que para evitar o traslado de familias ata as instalacións a repartición faise directamente a entidades que poden operar tanto en Verín, como no Barco, Celanova ou Carballiño.

Desde o banco de alimentos vigués, pola contra, admiten que coa crise si viron como o perfil do usuario que acode ao banco de alimentos é cada vez máis amplo. Así, agora atenden non só ás familias en risco ás que xa prestaban axuda antes, senón tamén a persoas que ata o inicio da pandemia non tiñan ningunha dificultade, así como aquelas que perderon o seu traballo ou se atopan nun ERTE e ven en dificultades para chegar a fin de mes. “Notamos unha nova clase social moi próxima ao limiar de pobreza”, afirman.

ALMACÉNS ESGOTADOS A UN MES DO NADAL

Á vez que co aumento de solicitudes, chegaron as dificultades engadidas. Desde Ourense advirten que están a atopar problemas para “ manter os criterios e protocolos sanitarios”. “Debemos citar máis espaciadamente ás entidades para a entrega dos alimentos”, comentan, como medida para tentar evitar aglomeracións durante a distribución.

Doutra banda, tamén rexistraron que os alimentos se están “esgotando no almacén” e xa empezan a mirar ao futuro máis inmediato. “Hai temor de non poder repartir neste Nadal tantos alimentos como en anos anteriores”, lamentan.

Desde Vigo fan un chamamento para que nesta campaña de ‘A Gran Recollida’, ante as trabas que supón a pandemia, a cidadanía participe na recollida online, xa que este ano celébrana "integramente de maneira virtual”. “Ante a imposibilidade de recoller alimentos físicos por parte dos nosos voluntarios nos supermercados, durante a próxima semana, entre o 16 e 21 de novembro, as persoas que vaian ao supermercado poderán facer un donativo económico en caixa que, despois nós, traduciremos en compra de alimentos”, engaden, á vez que insisten en que poden facer donativos vía Bizum ou comprar cestas solidarias na súa web. Tamén para o banco ourensán lembran que se poderán facer achegas en caixa e na súa páxina.

A chamada é especialmente perentoria neste caso porque, segundo transmiten desde o banco de alimentos, “os nosos andeis das naves de Vigo e Pontevedra están practicamente baleiras”. "Esperamos que con esta campaña da Gran Recollida podamos recadar o diñeiro necesario para comprar alimentos e seguir axudando. É o noso único obxectivo. Necesitamos tanto alimentos non perecedoiros como frescos, contamos con cámaras frigoríficas para poder manipular calquera produto”.

Na mesma liña, na entidade ourensá, onde catro persoas encárganse da actividade diaria, subliñan que este ano, ao non haber clasificación de alimentos, “non será necesario a axuda dos voluntarios e voluntarias que levaban a cabo este labor, que esperemos que pronto poidan retomar esta actividade”. No banco de alimentos de Ourense cobran especial relevancia os xubilados, que son a maioría dos voluntarios e que tamén acoden á organización para “socializar e colaborar”. “Formouse unha pequena familia de voluntarios do BAO”, consideran.

A axuda cidadá segue sendo fundamental para os bancos de alimentos, a pesar de que a pandemia tamén alentou a outras entidades para involucrarse. A necesidade desenvolveu en Vigo a iniciativa ‘ VigoIndustria’, pola que o banco recibiu 40 toneladas de alimentos este verán. En Ourense xa esgotaron todo o recibido nos meses de abril, maio e xuño, unha época na que tamén recibiron a axuda da deputación, a Xunta e cadeas de alimentación e empresas.

UN PANORAMA INCERTO

Para esta Gran Recollida o escenario é unha verdadeira incógnita para as entidades, xa que ao ser nunhas circunstancias tan extraordinarias que pola situación epidemiolóxica impedirá a presenza dos voluntarios físicos nos supermercados, non se aventuran a facer unha estimación concreta.

“Se mantivésemos a cifra de 300.000 quilos de alimentos recollidos o ano pasado durante a devandita acción, sería impresionante. Somos conscientes de que o contexto non é fácil, pero somos optimistas e esperamos que as persoas se poñan na pel dos que non teñen, ou teñen menos que nós”, recalcan, antes de apelar á “solidariedade” de todos os galegos.