Os mellores datos de coronavirus en varias semanas consolidan a esperanza dun cambio de tendencia en Galicia non moi afastado

Terceira xornada consecutiva sen datos pésimos de coronavirus en Galicia. As esperanzas dun cambio de tendencia están un pouco máis fundadas. Hai 17 días que os casos activos non crecían tan pouco. Hai 14 días que os novos positivos non crecían tan pouco. E o que é máis importante, non son datos puntuais, hai varios indicadores de tendencias que xa apuntan cara abaixo. Parece que o optimista escenario adiantado por Galiciapress o domingo non era un espellismo, e a luz ao final deste túnel poida que non se atope moi lonxe. Con todo, aínda queda un durísimo camiño por diante, como nos lembran os 21 mortos de onte, récord desde a primeira onda.

Os casos activos seguen subindo, son 84 máis ata sumar 9.376. É dicir, segue habendo máis contagios que a suma de curacións e defuncións. Con todo, a diferenza cada vez é máis pequena. Onte só foi do 0,9%, cuarto día á baixa.  

A media móbil a sete días da porcentaxe de cambio diario de casos activos encadea o seu terceiro día seguido baixando. Sitúase na 4,1% fronte ao 5,2% de fai cinco xornadas. Isto indícanos que o cambio de tendencia é real. Leve, moi recente e por tanto fráxil, pero perceptible.

No referido a os positivos por Covid-19 confirmados por PCR nas últimas 24 horas seguen en descenso en Galicia tras detectarse outros 425. Unha mellora notable fronte aos 597 do luns e tras superar os 700 nas xornadas da fin de semana. 

NON ESTAMOS ANTE UNHA MELLORA PUNTUAL

Este descenso déixase notar en varios indicadores que miden a tendencia da pandemia. Por exemplo, a incidencia acumulada a 7 días baixa a 168, terceira xornada seguida de descenso tras o pico de hai tres días con 172 diagnósticos por cada 100.000 galegos á semana.

Non se deberá o descenso en positivos a que o SERGAS faga menos test? En principio non, pois de ser así debería subir a taxa de positividade e isto non se está producindo.

A media móbil a sete días da porcentaxe de probas positivas leva cinco días á baixa. Descenso moi leve, hoxe ponse na contorna do 6,5% tras roldar o 7% a semana pasada. A taxa de positividade de onte é a mellor en cinco días.

Ademais, a media móbil a sete días de PCRs diarias está en máximos, por encima dos 8.500; aínda que é certo que o SERGAS onte e antonte completou menos test, pero isto sempre é así os domingos e os luns. A clave é que o último domingo e o último luns fixéronse máis test que o domingo e o luns anterior, o que confirma que a caída de positivos non se debe a menos test.

En todo caso, a mellora é moi recente e débil. De feito, a incidencia acumulada a 14 días aínda está en máximos.

DATOS POR ÁREAS SANITARIAS
Detectáronse 88 positivos confirmados por PCR nas últimas 24 horas na área sanitaria de Vigo; 84 na da Coruña e Cee; 76 na de Pontevedra e O Salnés; 62 na de Ferrol; 51 na de Santiago e O Barbanza; 38 na de Ourense e 26 na de Lugo.

En termos xerais, as áreas que máis están a mellorar son as de Ourense, Santiago e Lugo. As que non acaban de mellorar son Vigo e Pontevedra.

En canto aos casos activos de Covid-19, baixan en tres das sete áreas sanitarias galegas. En concreto, descenden a 1.272 na de Ourense --27 menos--; a 1.348 na de Santiago --12 menos-- e a 963 na de Lugo --20 menos--.

Por contra, os casos activos de coronavirus Covid-19 aumentaron a 2.126 na área de Vigo --54 máis--; a 1.603 na da Coruña e Cee --28 máis--; a 1.082 na de Pontevedra e O Salnés --33 máis-- e a 982 na de Ferrol --28 máis--.

Ata a data curáronse en Galicia 28.095 pacientes, o que supón un incremento de 343 con respecto aos rexistrados na xornada do luns. E realizáronse 706.326 PCR ata o momento, fronte ás 700.353 contabilizadas o día anterior.

RÉCORD DE FALECEMENTOS
En canto ás persoas falecidas han aumentado a 944 tras notificar Sanidade na tarde deste luns 21 vítimas mortais, unha ducia delas rexistráronse ou están relacionados con residencias de maiores, o que sitúa á deste luns como a xornada con máis mortes comunicadas polas autoridades sanitarias desde a primeira onda do coronavirus.

En concreto, a última xornada que alcanzou estas cifras de falecidos foi o pasado 11 de abril, cando se informou de 23 mortes debido á incidencia da pandemia en Galicia.

O pasado xoves notificouse o maior número de mortos nunha mesma xornada desde que comezou a segunda onda (13) e superouse a barreira dos 900 falecementos con coronavirus. 

A primeira morte computada na Comunidade na denominada 'nova normalidade' foi a dunha muller o 7 de agosto. Antes diso, Galicia encadeara case dous meses --desde o 10 de xuño-- sen decesos relacionados coa pandemia.

En definitiva, ningún indicio de melloría na serie de falecementos. Pola experiencia acumulada sabemos que calquera melloría na serie de novos contagios tardará varias semanas, case un mes, en trasladarse á estatística de óbitos. 

AUMENTA MOITO A PRESIÓN NOS HOSPITAIS

Outro mal dato é a evolución de as hospitalizacións. En só dous días hai 58 persoas máis ingresadas en planta. Se a esta cifra sumamos os 30 falecidos nos últimos dous días, resulta que os hospitais galegos levan dúas xornadas recibindo uns 44 pacientes con covid de media.

Por tanto, a porcentaxe de camas ocupadas por pacientes con coronavirus crece. Está xa sobre o 6,6%, cando hai un mes non chegaba ao 3%. Moi lonxe aínda do 15% da media estatal.