O Festival Noroeste non se deixa vencer polo coronavirus e organiza concertos para ata 400 persoas

Artistas galegos, como Triángulo de Amor Bizarro, Víctor Coyote ou Moura, actuarán a partir do 7 de agosto ao fío das Festas de María Pita. As entradas serán gratis, pero haberá que reservalas con antelación.

O Festival Noroeste Estrela Galicia, da Coruña, estrea formato "XS" con 16 artistas coruñeses ou galegos e reserva previa de entradas para concertos con aforo limitado a 400 persoas. Entre o día 7 e o 9 deste mes, dous escenarios acollerán a 34 edición do festival.

"É un clásico na oferta cultural das festas", explicou a alcaldesa, Inés Rey, na rolda de prensa de presentación. Por iso, engadiu, coa situación de crise sanitaria, decidiuse "reformularlo en formato reducido" para dar "maior protagonismo" a artistas locais ou galegos e, así, "reducir desprazamentos entre territorios".

A ALCALDESA PIDE "SENTIDIÑO"
Para gozar dos espectáculos "de maneira segura, con sentidiño", o aforo máximo será de 400 persoas, que terán que reservar a entrada de maneira previa a través de internet, e deberán levar máscara. O mobiliario será hixienizado entre concerto e concerto, engadiu a rexedora.

"Este ano non haberá presenza de bandas internacionais, pero hai que velo como unha oportunidade; unha volta ás raíces e ao apoio ao talento local e galego", resaltou Rey, que avanzou que os dous escenarios levarán o nome de dúas "figuras" da música local falecidos o ano pasado: Nonito Pereira e Jaime Manso.

PRESENTACIÓN DE DISCOS
O director do festival, Roberto da Iglesia, resaltou que Triángulo de Amor Bizarro, Moura ou Víctor Coyote presentarán disco nos seus respectivos concertos e lamentou que o coronavirus non permitise desenvolver a idea inicial de festival, "cun plus de contido, ampliando variedade e artistas de distintos recunchos do planeta".

Pola súa banda, o director de Asuntos Corporativos de Estrela Galicia, Antonio Vello, defendeu a necesidade de "reinvención" tras a crise sanitaria e tamén de "adaptación". "Necesitamos animarnos un pouco para insuflar ánimos a toda a cidade", avogou.