A brecha entre ricos e pobres agrándase en Galicia: un de cada seis galegos atópase en risco de pobreza

O 20% da poboación galega, unhas 540.000 persoas, vive en risco de pobreza en 2019, segundo a 'Enquisa de Condicións de Vida' publicada este martes polo Instituto Nacional de Estatística (INE).

Esta taxa increméntase en máis dun punto respecto ao ano 2018, cando a cifra de risco de pobreza situábase no 18,8%.

A poboación nesta situación en Galicia (o 20%) é moi similar ao dato rexistrado en España (20,7%). Ocupa o oitavo posto entre comunidades. As taxas máis elevadas déronse en Estremadura (31,5%), Andalucía (31,3%) e Canarias (28,5%), mentres que a Comunidade Foral de Navarra (7,7%) e País Vasco (10,0%) presentaron as máis baixas.

En canto á taxa AROPE de risco de pobreza ou exclusión social --que se constrúe coa poboación que se atopa en risco de pobreza ou con carencia material ou con baixa intensidade no emprego--, en Galicia sitúase no 24,3%, un punto por baixo da media (25,3%).

As taxas AROPE máis elevadas déronse en Estremadura (37,7%), Andalucía (37,7%) e Canarias (35,0%). Pola súa banda, Comunidade Foral de Navarra (11,7%) e País Vasco (14,4%) presentaron as taxas de risco de pobreza ou exclusión social máis baixas.

DIFICULTADES FIN DE MES

Por outra banda, en Galicia o 5,7% dos fogares ten moita dificultade para chegar a fin de mes, dous puntos por baixo da media nacional do 7,7%.

Ademais, segundo esta enquisa do INE, o 26,3% das familias de Galicia non ten capacidade para afrontar gastos imprevistos (a media nacional é do 33,9%) e o 4,8% recoñece atrasos nos pagos relacionados coa vivenda, por baixo da media (6,9%).

Así mesmo, indica que o 40,8% dos fogares galegos non pode permitirse irse de vacacións fóra de casa unha vez ao ano (33,4 por cento no resto do país).

Os ingresos medios anuais netos por persoa en Galicia situáronse en 11.218 euros, por baixo da media nacional, que é de 11.680 euros.

DATOS ESTATAIS

O 34,2% dos adultos que vivían en fogares cunha situación económica mala ou moi mala na adolescencia ten ingresos moi baixos na actualidade, mentres que o 9,4% ten ingresos moi altos, segundo unha enquisa de 2019 de Instituto Nacional de Estatística (INE).

Esta diferenza nas porcentaxes correspondentes a 2019 é superior á obtida na enquisa de 2011 (30,2% con ingresos moi altos e 12,1% con ingresos moi baixos).

Así se desprende dos resultados da 'Enquisa de Condicións de Vida' que o pasado ano, como en 2011, incorporaba un módulo sobre transmisión interxeracional da pobreza. As preguntas dirixíronse a persoas de 25 a 59 anos e están relacionadas con algunhas características dos fogares nos que vivían cando eran adolescentes.

Desta forma, o estudo realizado polo INE apunta que o 13,2% dos adultos que vivían en fogares cunha situación económica boa ou moi boa ten ingresos moi baixos na actualidade, mentres que o 29,9% dispón de ingresos moi altos. A diferenza nas porcentaxes é similar á de 2011 (13,9% con ingresos moi baixos e 31,2% con ingresos moi altos).

Respecto ao nivel de formación, o estudo sinala que dos adultos que vivían en fogares cunha situación económica mala ou moi mala, un 26,9% ten agora educación primaria ou inferior e unha 15,8% educación superior. Con todo, a brecha é menor que en 2011, cando un 37,2% tiña educación primaria ou inferior e unha 15,2% educación superior.

Pola súa banda, só o 3% dos adultos que vivían en fogares cunha situación económica boa ou moi boa ten educación primaria ou inferior e unha 56,5% educación superior. Neste caso, a diferenza de porcentaxes si é superior á de 2011 (7,9% con educación primaria ou inferior e 46,0% con educación superior).

A recollida de datos desta enquisa anual produciuse no terceiro cuadrimestre de 2019, sobre unha mostra efectiva formada por unhas 40.000 persoas. Trátase dunha enquisa panel na que as persoas entrevistadas colaboran catro anos seguidos.