Feijóo pide despolitizar a sanidade e ataca a Moncloa por "o atraso da alerta" que "custou miles de vidas"

Apostar pola Sanidade Pública e ao mesmo tempo "non demonizar" a sanidade privada, construíndo un gran pacto a nivel estatal. Esta é unha das receitas que esgrime o candidato conservador para saír dunha pandemia que cre agravou o Goberno de Pedro Sánchez

O presidente da Xunta e candidato do PPdeG á reelección, Alberto Núñez Feijóo, reivindicou este luns a súa xestión da pandemia e contrapúxoa coa do Goberno central, ao que atribuíu un "atraso da alerta epidemiolóxica" de "dez ou quince días" que "custou centenares de vidas, miles de vidas" en España.

A favor DO PACTO SANITARIO

Nun encontro telemático organizado por Nova Economía Fórum, no arranque da última semana de campaña para o 12 de xullo, Feijóo defendeu que a el gustaríalle que en España houbese "un pacto sanitario", pero "cando o PP goberna, ao PSOE non lle interesa" e, ao seu modo de ver, cando son os socialistas os que están á fronte do Executivo, non expoñen un posible acordo "en serio".

Feijóo, quen desde o punto de vista estatístico reivindicou "os bos" datos de Galicia na pandemia, aínda recoñecendo que nunha pandemia que se levou vidas por diante as cifras "nunca son razoables", defendeu a importancia da sanidade e lamentou que calquera consenso sexa "moi difícil" cun Executivo no que "segue instalado o non é non" de Pedro Sánchez.

"Sen sanidade non somos nada, non hai economía, non hai actividade laboral, non hai nada"

"Sen sanidade non somos nada, non hai economía, non hai actividade laboral, non hai nada", advertiu, antes de mostrarse convencido de que Galicia tivo unha mellor "resposta" fronte ao coronavirus porque, na súa década á fronte da Xunta, investiu "moito" en infraestruturas sanitarias e hospitalarias.

Lembrou que aínda quedan investimentos pendentes e resaltou a importancia da planificación, xa que o "período de maduración" dos proxectos sanitarios é "dunha década". Así mesmo, apelou a "reforzar os ámbitos da saúde pública".

"GRAVÍSIMO ERRO" DO GOBERNO
A xuízo de Feijóo, "un dos gravísimos erros" do Executivo que dirixe o socialista Pedro Sánchez fronte á pandemia foi "o atraso da alerta epidemiolóxica", que "custou centenares de vidas, miles de vidas". "Chegar tarde dez ou quince días á alerta provocou o colapso nos hospitais de Madrid e tamén nas grandes capitais", asegurou.

Tamén destacou que ao colapso nesas grandes cidades, con aeroportos, contribuíron "todos os acontecementos económicos, culturais, deportivos e políticos que se deixaron facer na primeira quincena de marzo". "Foi letal", advertiu, convencido de que todo iso derivou en "unha infección masiva" que nas grandes capitais colapsou as urxencias.

Así, tras enxalzar os pasos dados en Galicia e a aposta, por exemplo, pola "teleasistencia" para "evitar ingresos innecesarios", insistiu en que en España é preciso "reforzar os resortes da saúde pública e das alertas epidemiolóxicas".

Ao seu modo de ver, é necesario que "as poucas competencias" que ten o Goberno "exérzaas con rigor", xa que, pola contra, son os servizos sanitarios das comunidades as que "sofren as consecuencias".

"DESPOLITIZAR A SANIDADE"
O dirixente popular tamén defendeu que hai que "despolitizar a sanidade" e que os políticos deben "deixar de facer demagoxia e de sementar discordia" neste ámbito. "Se un poítico non sabe de sanidade, que cale, pero que non entorpeza a xestión profesional", pediu.

A continuación, advertiu que "non se pode demonizar a sanidade privada", que ve "unha oportunidade para que as persoas de renda media alta poidan ter un dobre aseguramento" que favoreza "descolapsar" o sistema sanitario público.

Para Feijóo é "un erro e un grave prexuízo ideolóxico" estar "en contra" de que unha persoa "a través da súa renda poida ter un aseguramento adicional e use menos" a sanidade pública. Que "as dúas sanidades poidan coexistir", defendeu, favorece que se poida "mellorar a saúde cidadá".