PSA Citroën Vigo elimina medidas anti-coronavirus para producir máis, denuncian dous sindicatos

As dúas centrais nacionalistas presentes no Comité de Empresa alertan que a fábrica eliminou os descansos que os traballadores utilizaban para adoptar medidas de hixiene extra

Os sindicatos CIG e CUT presentaron escritos este venres no rexistro da Xunta, en Santiago de Compostela, destinado a diferentes organismos e entidades como Inspección de Traballo, Sergas e Ministerio de Sanidade para reclamar que se vele pola saúde dos empregados da planta de PSA Citroën de Vigo fronte ao coronavirus.

En declaracións á súa saída do rexistro de San Caetano, Manuel Domínguez Delgado (CIG) explicou que se recorre a diferentes administracións para que "teñan coñecemento do que está a pasar alí dentro", despois de que a empresa fixese caso "omiso" das reivindicacións dos traballadores en materia de prevención fronte á COVID-19, o que considera un "risco".

A SAÚDE DEBE SER O PRIMEIRO, LEMBRAN OS SINDICALISTAS

Así, quéixase de que "de súpeto, da noite para a mañá", PSA "tomou a decisión de retirar" as medidas contra o coronavirus que tiña implantadas, mentres na factoría olívica traballan unhas 7.000 persoas con quendas duns 2.000 empregados.

Nesta liña, Víctor Manuel Mariño (CUT) censura que "a empresa está a primar a produtividade fronte á saúde". E é que critica que PSA retirou medidas "sen acordar co propio Issga (Instituto Galego de Seguridade e Saúde Laboral)".

PRODUCIR MÁIS RÁPIDO

A modo de exemplo, expón que a dirección "acaba de reducir todos os descansos" que facilitaban a hixiene, mentres "aumenta a velocidade das liñas a ritmos prepandemia", o que impide unha adecuada desinfección, alerta.

De tal forma, Mariño recrimina que a compañía "está en contra das medidas que recomenda o propio Ministerio e está a poñer en risco a saúde dos traballadores". Por todo iso, avisa de que "calquera posible contaxio pode ter consecuencias dramáticas no sector" nun contexto de rebrotes.