Na residencia da Fonsagrada había máis anciáns que prazas autorizadas

A Xustiza comeza a interrogar aos imputados polo suposto abandono dos anciáns das vivendas comunitarias de Burón, na montaña de Lugo. Varios deles seguen no hospital. Afortunadamente, por agora ningún deu positivo en coronavirus.

A maxistrada do xulgado de primeira instancia e instrución do concello lugués da Fonsagrada comezará este xoves para tomar declaracións polo caso das dúas vivendas comunitarias (Burón I e Burón II) que foron clausuradas pola Xunta o pasado 8 de abril, despois de constatar as malas condicións nas que vivían os 29 anciáns destes centros.

A Garda Civil vixiando a residencia clausurada nunha foto da CRTVG 

Fuentes do TSXG confirmaron a Europa Press que este xoves iniciarase o proceso de toma de declaracións, tanto para aquelas persoas que están citadas en calidade de testemuñas como de investigados. Ao longo desta semana e da que vén coñeceranse os testemuños dos chamados a declarar.

Entre eles atópanse diversas persoas que forman parte da dirección e propiedade destas dúas vivendas tuteladas, pero tamén testemuñas que darán a súa versión á xuíza para clarificar os feitos.

Estes foron trasladados á Fiscalía pola posibilidade de que o caso fose constitutivo dun ilícito penal debido á "gravidade" das circunstancias, segundo informou a Consellería de Política Social.

"SITUACIÓN DE GRAVIDADE"
A primeira denuncia partiu dun informe emitido polos servizos sociais da Fonsagrada o martes 7 de abril. Nel advertiuse á Administración galega dunha posible situación de malos tratos aos residentes do centro e de diversas irregularidades tanto nas condicións como na atención aos mesmos.

Pola gravidade da situación alertada no documento, a inspección de servizos sociais da Xunta desprazouse ao centro para corroborar os feitos retratados na denuncia e tamén remitiu un aviso a corpo de Garda Civil.

Os efectivos desprazados constataron a situación na que se atopaban estes residentes, un total de 29 anciáns nun centro con 23 prazas e en condicións inadecuadas, que motivaron a urxencia das actuacións desde a Administración galega para ordenar o peche inmediato das instalacións.

TRASLADADOS Ao Carballiño
Ao longo desta semana os maiores están a ser recolocados no centro público do Carballiño. O traslado empezou este martes entre os que se atopan en condicións para ser desprazados e entre os que as familias dos afectados aceptan a proposta da Consellería de Política Social.

Segundo as fontes consultadas por Europa Press, todos eles deron negativo ás probas da COVID-19, aínda que o seu estado é moi diferente e parte deles terán que seguir ingresados varios días máis no HULA por estar en peor condición física.

Na residencia do Carballiño poderán recibir a atención sociosanitaria que necesitan e un seguimento individualizado da súa evolución, explicou a Xunta esta semana.