O avión con material sanitario doado por Inditex aterra en España

A compañía de Amancio Ortega comprometeuse a organizar un envío semanal desde China, este sería o primeiro

Un avión procedente de China aterrou no Aeroporto de Zaragoza con máis de 300.000 máscaras cirúrxicas e 75.000 equipos individuais de protección doados por Inditex ao Goberno de España, no marco dentro da loita contra o coronavirus e o apoio ao persoal sanitario dos hospitais españois.

O voo, da compañía Atlas Air, chegou sobre as 11,30 horas ás instalacións aeroportuarias de Garrapinillos, e procedeuse a descargar a mercadoría para o seu traslado aos almacéns que Inditex ten na Plataforma Loxística de Zaragoza.

A compañía Inditex xa anunciou o pasado mércores que puxo ao dispor do Goberno toda a súa capacidade loxística, de aprovisionamento e de xestión comercial, sobe todo desde China, para atender as necesidades de urxencia, tanto de material sanitario como téxtil que se están necesitando nestes momentos.

PROMESA DUN ENVÍO SEMANAL
Inditex asegurou que realizará polo menos un envío semanal do material que se compre directamente. En concreto, a firma está a traballar para traer o material que as autoridades sanitarias españolas sinalaron como máis urxentes, como máscaras, luvas, lentes protectoras, gorros, calzas e protectores faciais.

De feito, estas 300.000 máscaras cirúrxicas protectoras súmanse ás 10.000 xa doadas. Ademais Inditex vai dar apoio loxístico para transportar desde China a compra que o Goberno faga de maneira directa.