A Xunta necesita equipos de protección para hospitais, ambulancias e outras emerxencias

Feijóo non quere que se interprete como unha crítica a Moncloa, pero por segundo día consecutivo reclama que chegue material sanitario. Hai polo menos catro técnicos de ambulancias en corentena por trasladar positivos de coronavirus sen Equipo de Protección Individual (EPIs).

O presidente da Xunta, Alberto Núñez Feijóo, urxiu de novo material sanitario ao Goberno central, co fin de poder combater "con garantías e seguridade" a crise do coronavirus na Comunidade.

FALTAN EPIS MESMO PARA AMBULANCIAS
"Volvemos poñer encima da mesa a necesidade de equipos de protección individual para centros sanitarios, ambulancias, residencias de maiores e centros de discapacitados con internamentos; así como para persoal de Protección Civil e o que se ocupa do tratamento de residuos, entre outros colectivos que necesitan medios para traballar con garantías e seguridade", trasladou Feijóo.

Así se pronunciou, nunha rolda de prensa 'online', tras a reunión do centro de coordinación operativa activado pola crise sanitaria e despois da reunión do seu Executivo.

FEIJÓO DI QUE NON CRITICA, SÓ PIDE
Feijóo subliñou que, aproveitando a presenza do delegado do Goberno en Galicia, Javier Losada, na reunión do centro de coordinación, volvéuselle a trasladar que "a prioridade número uno en Galicia é contar con material sanitario competente" e que só o Ministerio do ramo é "competente" para a súa distribución.

"Insisto en que isto non significa ningún rozamento nin emenda ao Goberno", dixo o xefe do Executivo autonómico, quen destacou o "espírito construtivo" do encontro do centro de coordinación.

Garantiu que, cando Galicia dispoña dese material --foi preguntado polo anuncio do Goberno de que repartiría test rápidos entre as comunidades--, informará respecto diso.