Tres persoas durante sete horas para atender os case 20.000 veciños de Moaña, denuncia CIG Saúde
CIG Saúde denunciou este mércores que o Punto de Atención Continuada de Moaña (Pontevedra) estivo o pasado domingo durante 7 horas coa metade de persoal médico, unha situación que a xerencia da área sanitaria coñecía con antelación, sen que tomase medidas para evitala.
Protesta dos traballadores dos PACs galegos
Segundo o sindicato nacionalista, o domingo de 15,00 a 22,00 horas, tan só había un equipo de facultativo/a-enfermeiro/a, e unha enfermeira a maiores, cando o habitual é que haxa dous equipos completos.
Nesta situación, denunciou, "en caso de saída do equipo, quedaría unha soa enfermeira tendo que resolver os problemas" do PAC, co agravante de que esta traballadora non está facultada para prescribir medicación.
Nesas horas, Moaña "quedou con menos atención médica da habitual, por baixo das necesidades da poboación, e coa consecuente sobrecarga do persoal que estaba no centro", subliñou a CIG.
Así mesmo, trasladou a "preocupación" destes traballadores porque que a situación se pode repetir, e non se cobren as ausencias. A ese respecto, o sindicato lembrou que, con motivo da realización das probas da OPE de Medicina de Familia e Comunitaria, o próximo 1 de marzo, boa parte do persoal facultativo dos PAC, que é eventual, non estará nos seus postos.
Escribe o teu comentario