Unha loba e tres cachorros híbridos vivían nunha leira en Quintela de Leirado (Ourense)
O dono explica que comprou por internet o exemplar pensando que só era un lobicán checo, pero empezou a sospeitar cando fixo un oco de dous metros para parir, polo que encargou análises xenéticas
O Servizo de Protección da Natureza (Seprona) da Comandancia da Garda Civil de Ourense localizou nunha leira anexa a unha vivenda en Quintela de Leirado un exemplar de lobo ibérico, con tres cachorros hibrídos, do cruzamento da loba cun can común.
Segundo informou o Instituto Armado, o Seprona tivo coñecemento o 14 de novembro de 2018 de que un veciño de Quintela de Leirado tiña nunha leira próxima á súa vivenda un canido que, polo seu comportamento e morfoloxía, puidese tratarse dun lobo (Canis Lupus).
Animais intervidos en Quintela nunha imaxe da CRTVG
Por iso, relataron as mesmas fonte, realizouse unha inspección do animal e o día 10 de febreiro de 2019 procedeuse á recollida dunha mostra biolóxica de carácter indubitado, para a realización de estudos de ADN que analicen a composición xenética do canido e categorice a súa raza.
Como resultado desas probas realizadas polo Departamento de Medio Ambiente do Servizo de Criminalística da Garda Civil, obtívose o perfil xenético dos restos biolóxicos analizados, e confirmouse que se trataba dun exemplar de Canis Lupus Signatus (Lobo ibérico).
O día 12 de febreiro faise cargo dos animais o Servizo de Patrimonio Natural da Consellería de Medio Ambiente da Xunta de Galicia, tras ser entregados voluntariamente polo propietario.
Escribe o teu comentario