A Xunta esqueceuse do Rey á hora de promulgar tres leis
O xefe do Estado, que carece de poderes lexislativos, si posúe unha relevante posición simbólica pois o Estatuto de Galicia fixa que todas as leis deben publicarse no seu nome
A Xunta de Galicia publicou este martes no Diario Oficial de Galicia (DOG) tres correccións de erros correspondentes a tres leis nas que non se incluíu o parágrafo para promulgalas "en nome do rei".
En concreto, as normas ás que afecta esta modificación, que non transcende máis aló da anécdota, son a de orzamentos do Goberno galego para este 2020, a de medidas fiscais que a acompaña e a de regulación do aproveitamento lúdico de augas termais, todas elas do 23 de decembro.
Estas tres correccións de erros tan só engaden a estas leis o seguinte parágrafo: "Por todo o exposto, o Parlamento de Galicia aprobou e eu (Alberto Núñez Feijóo), de conformidade co artigo 13.2 do Estatuto de Autonomía de Galicia e co artigo 24 da Lei 1/1983, do 22 de febreiro, de normas reguladoras da Xunta e da súa Presidencia, promulgo en nome do rei a Lei (...)".
E é que, de acordo co artigo 13.2 do Estatuto de Autonomía, as leis aprobadas pola Cámara autonómica "serán promulgadas en nome do rei polo presidente da Xunta" --neste caso, Alberto Núñez Feijóo--, unha formalidade que non figuraba na publicación inicial do DOG.
Escribe o teu comentario