​Asociación de pacientes denuncia o colapso continuado no Servizo de Urxencias do CHUS

A Asociación de Pacientes do CHUS critica a situación no Servizo de Urxencias que se viviu na tarde de onte no complexo compostelán, onde "18 pacientes graves esperaban a ser atendidos, en padiolas e cadeiras de rodas, nos corredores de acceso".

Colapso en Urxencias | Foto: Asociación de pacientes e usuarios do CHUS

A plataforma advirte que mentres isto ocorría había "38 pacientes, con ingresos asinados, que esperaban o traslado a planta ocupando as zonas de traballo nas que deberan ser atendidos os pacientes do corredor". Este novo episodio de colapso supón "un dano moral e físico" aos usuarios do servizo "que non están obrigados a padecer", subliña a nota da asociación.

"DESCARO E DESVERGOÑA"

"A xerencia do CHUS e o SERGAS, con absoluto descaro e desvergoña, afirman publicamente que as nosas denuncias son falsas a pesar das innumerables probas gráficas e de testemuños de pacientes que se viron na desagradable e indigna situación de ter que soportar o trato recibido no servizo", afirman desde a plataforma, que cuestiona aos organismos sobre se funciona ou non con normalidade o servizo.

"Se efectivamente o servizo funciona con normalidade, por que hai pacientes graves nos corredores esperando horas a ser atendidos? Se todos os recursos están dispoñibles, por que os pacientes con ingreso en planta ocupan as zonas de traballo durante horas?", interpela a asociación, que achaca esta situación ao "proceso de degradación asistencial" que vén dando na sanidade galega, á que tamén tacha de "triturado asistencial para os pacientes e usuarios".

"Os responsables sanitarios de garantir os nosos dereitos non achegan os medios materiais e humanos necesarios en todas as especialidades do clínico e nos servizos de Atención Primaria que reduzan a asistencia de pacientes ao servizo e que permita dispoñer das camas cando a nosa saúde requíreo", conclúe a plataforma de pacientes e usuarios.