Os nenos enfermos de Touro e O Pino han de ir ata Santiago ou Arzúa para ver un pediatra, denuncia o PSOE
Os coñecidos problemas do SERGAS para cubrir as prazas de pediatría nos centros de saúde rurais tamén afectan a municipios da periferia de Santiago, denuncian desde o PSdeG
Alcaldes e portavoces socialistas da comarca de Santiago criticaron este xoves as "inaceptables e inasumibles carencias" no servizo de pediatría dos seus municipios e avanzaron que poñerán en marcha nas próximas semanas "medidas de presión" para "esixir un cambio de postura da Consellería de Sanidade".
Reunión de alcaldes do PSdeG
"Temos un grave problema coa sanidade pública, a Xunta non cobre as ausencias dos pediatras durante as baixas ou as vacacións, o que obriga aos pais e nais a desprazarse para que os seus fillos reciban atención", afirmou Antonio Leira, portavoz do PSOE comarcal.
A situación, denuncian, é "moi preocupante" en concellos como O Pino ou Touro, onde os pais deben desprazarse a Arzúa ou a Santiago cando o seu fillo enferma. Fronte a iso, os socialistas presentarán iniciativas nos plenos municipais e no Parlamento de Galicia e "tomarán outras medidas" en próximas datas.
"É o momento de tomar outro tipo de medidas que iremos anunciando, está en xogo a saúde dos nosos fillos e non queremos esperar a que pase algo grave", finalizou Antonio Leira.
Escribe o teu comentario