Alerta alimentaria: un turrón brando de améndoa vendido en Galicia pode ser perigoso para intolerantes á lactosa

A Axencia Española de Seguridade Alimentaria e Nutrición (Aesan) activou unha alerta de alérgenos pola presenza de leite non declarado na etiquetaxe dun turrón brando de améndoa procedente de Cataluña e comercializado en Galicia, entre outras comunidades.

En concreto, trátase dun turrón da compañía Vicens, que contén leite non declarado nas unidades de 500 gramos, con data de consumo preferente: 02/2021 e número de lote: 329-X.

A presenza deste alérgeno podería afectar aos intolerantes ou alérxicos ao leite, polo que Aesan recomenda que este tipo de persoas non consuman o produto.

Para o resto de consumidores, a institución destacou que o turrón non comporta ningún tipo de perigo e o seu consumo é apto. O problema foi detectado pola propia compañía nun dos seus controis, polo que desde que tivo coñecemento activou o seu procedemento de xestión de alertas e avisou aos seus clientes.

Pola súa banda, a Axencia Española de Seguridade Alimentaria e Nutrición tivo coñecemento a través do Sistema Coordinado de Intercambio Rápido de Información (SCIRI), dunha notificación de alerta trasladada polas Autoridades Sanitarias de Cataluña, relativa á presenza de leite non mencionado na etiquetaxe deste turrón.

O produto afectado foi fabricado en Cataluña e foi distribuído en Galicia, Castela a Mancha, Comunidade Valenciana, Andalucía, Asturias, País Vasco, Castela e León, Illas Baleares, Cantabria, Canarias, A Rioxa, Comunidad de Madrid, Cataluña, Murcia, Navarra, Aragón, Francia e Andorra.

As autoridades competentes de cada comunidade xa foron avisadas e tamén os Servizos da Comisión a través do RASFF (Rede de Alerta Alimentaria europea).