O TSXG ordena a inclusión de máis de 20 mil traballadores da sanidade pública na carreira profesional

A Federación de Sanidade de Comisións Obreiras de Galicia celebra que os máis de 20 mil profesionais da sanidade pública sexan incluídos na carreira profesional do SERGAS, así como das entidades adscritas á Consellería de Sanidade.

Representantes de CC.OO.

O sindicato Comisións Obreiras (CC.OO.) confía en que o Tribunal Supremo (TS) ratifique a recente sentenza do Tribunal Superior de Xustiza de Galicia (TSXG) que obriga a estender a carreira profesional aos colectivos inicialmente excluídos no decreto do Sergas que o regula.

Así o manifestaron este luns en rolda de prensa a secretaria xeral da Federación de Sanidade de Comisións Obreiras, Emilia Lamas, e a avogada do sindicato, Lida da Iglesia, que compareceron acompañadas polo exsecretario da Federación de Sanidade que iniciou o proceso xudicial, Anxo Cameselle.

DOUS ANOS DE LOITA

Emilia Lamas lembrou que o proceso para reivindicar a carreira profesional para todo o persoal comezou en outubro de 2017 coa firma da acta de fin de folga na que figuraba o comezo da negociación para todo o persoal do SERGAS.

Posteriormente, sinalou Lamas, en 2018 iniciouse a negociación dun decreto de carreira profesional para o persoal do SERGAS que culminou coa firma do documento por parte do resto de sindicatos da mesa sectorial, salvo Comisións Obreiras e Ou'Mega.

"Comisións insistiu na necesidade de que fóra de ámbito de aplicación todo o persoal do SERGAS", sinalou Lamas, e o Servizo Galego de Saúde "dicía que non, que era imposible". Tras iso, este sindicato presentou un informe xurídico que "facía referencia a sentenza e a normativa europea".

A pesar diso, insistiu Emilia Lamas, "o SERGAS fixo caso omiso a sentenza que había e pasouse polo forro esa recomendación", apostilou. CC.OO. defendeu na súa denuncia xudicial no carácter "discriminatorio" do decreto "por ir en contra de toda a normativa".

"Grazas ao TSXG, os tribunais rectifican unha vez máis á Administración e arranxan o que a Administración e as entidades asinantes fixeron", destacou Lamas, que valorou que o fallo do alto tribunal galego "anula artigos que discriminan ao persoal".

"CASO OMISO"

Lamas insistiu en que o SERGAS fixo "caso omiso" das "recomendacións dos seus servizos xurídicos" que lle advertiron de que non se debía excluír ao persoal polo vínculo temporal.

Respecto diso, destacou que Comisións Obreiras solicitou o pasado venres na mesa sectorial ao SERGAS e sindicatos asinantes do documento que deixasen sen efecto o decreto "e non obriguen a acudir aos traballadores dos tribunais", mentres non haxa resolución do Supremo, tras o recurso presentado pola Xunta.

Neste sentido, a avogada do sindicato, Lida da Iglesia, resaltou que o fallo do TSXG admite "discriminación" de persoal e "non diferencia pola duración do vínculo" temporal. "Entendo que o Supremo nos volverá a dar a razón", abundou.

"Entendemos que o TS nos volverá a dar a razón e que a Unión Europea vai ter que acabar pronunciándose polos incumprimentos das normativas por ser contrario a dereito", explicou a letrada tras indicar que unha sentenza deste ano recoñeceu isto en Baleares. "Celebrar este éxito que vai beneficiar á metade do persoal", sentenciou.

Finalmente, Lamas reiterou que, aínda que queda pendente percorrido xudicial polo recurso presentado polo SERGAS, a aplicación será retroactiva "desde xaneiro de 2019".