#sosyago : Militares, voluntarios e outros colectivos súmanse á desesperada busca de Yago de la Puente

Infantes de mariña, bombeiros, axentes de protección civil, persoas particulares e así ata sumar ducias de colectivos e formar unha rede de 400 persoas que peiteou Moeche e Cerdido. Desgraciadamente, non hai noticias do mozo que desapareceu tras o Festival de Ortigueira.

O dispositivo de procura do mozo Yago de la Puente, en paradoiro desaparecido desde mediados de xullo, finalizou ao mediodía deste martes sobre as 13,30 horas, pero sen novidades ou resultados que arroxen luz sobre a súa situación.

Unhas 400 persoas peitearon e rastrexaron as zonas de Cerdido e Moeche en busca do novo, nuns traballos que se estenderon durante máis de cinco horas.

Os participantes foron citados ás 8.00 horas na chaira exterior da estación de tren de FEVE en Cerdido (A Coruña), lugar no que se lle perdeu a pista a este mozo coruñés que regresaba de pasar a fin de semana en Ortigueira, concretamente no Festival do Mundo Celta, o 14 de xullo.

Alí déronselles a todos eles instrucións de como se realizaría a procura, nunhas tarefas na que tomaron parte e coordinaron desde a Garda Civil, con varias unidades da zona de Seguridade Cidadá e Policía Xudicial.

CANS ESPECIALISTAS
Tamén contaron co apoio dun helicóptero da Benemérita, de efectivos das agrupacións de Protección Civil de Cedeira, As Pontes, Ortigueira e Valdoviño, Bombeiros da Coruña, GES de Mugardos, Policía Local da Coruña, militares de Infantería de Mariña do Terzo do Norte, con sede en Ferrol, integrantes de Casaga, con varios dos seus cans adestrados na localización de persoas, axentes da Policía Nacional sen uniformar e familiares e amigos do novo desaparecido.

En suma, constituíronse ata 55 grupos integrados por cinco persoas, ademais doutros formados por dez efectivos, que percorreron boa parte do territorio tanto do Concello de Cerdido como do limítrofe de Moeche

Os efectivos contaron coa colaboración dunha empresa, "Trileuco Solutions", que achegou os equipos para a procura a cada unha das cuadrillas, e a empresa de roteiros de vehículos 4x4 "Noemborques", que serviu de transporte para algunhas delas.