​O 'Gato de Catoira' regresa á gaiola de cal

Sergio Álvarez leva case un ano sen enfundarse as luvas, pero a lesión de Rubén aúpa ao 'Gato' á portería do Celta de Vigo para defendela esta fin de semana ante o Vilarreal.

Sergio Álvarez apunta á titularidade o domingo | Foto: RC Celta

Só hai unha profesión onde a sorte e o infortunio déanche o mesmo número de oportunidades: a de gardameta. O porteiro vive dos seus acertos e dos desacertos dos demais, e ás veces das desgrazas alleas. Sen celebralo, a lesión de Rubén Blanco supón o regreso de Sergio Álvarez á meta do Celta de Vigo, un foro que o 'Gato de Catoira' non pisaba desde decembro de 2018.

O TÁNDEM

Sergio e Rubén; Rubén e Sergio. É imposible comprender o Celta dos últimos anos sen o tándem destes dous cérberos na portería celeste. Os dous comparten vestiario desde hai anos e fóronse alternando na portería de forma case constante desde a irrupción de Blanco, o máis novo dos dous. Canteiráns, en cada mercado de fichaxes o seu camiño parece separalos ou traerlles un novo competidor a Vigo, pero a decisión sempre terminou entre eles dúas, e para os adestradores sempre foi difícil decantarse por un xa que supón elixir entre papá ou mamá.

Con todo, nos últimos tempos a balanza inclinouse en favor do meta de Mos, que xa a tempada pasada arrebatou a titularidade a Sergio desde a chegada de Cardoso. Escribá terminou por darlle a confianza definitiva a Rubén e o de Catoira non suma minutos desde o 5 de decembro do ano pasado, momento en que encaixou dous goles no partido de volta de Copa do Rey ante a Real Sociedade.

KM CERO

Agora, coa chegada de Óscar García, os dous seteiros poderían partir de cero e en igualdade de condicións, pero o certo é que só a lesión de Rubén Blanco esta semana propiciou que o técnico catalán entregue o bastón de mando ao 'Gato'. 

Desde os servizos médicos do club non quixeron dar moitas pistas sobre o alcance da lesión do que viña sendo o gardameta titular en Balaídos. "Rubén Blanco sufriu unha escordadura no ligamento lateral interno do seu xeonllo esquerdo durante o adestramento deste martes pola tarde. O porteiro iniciará de inmediato a súa recuperación e o tempo de baixa dependerá da súa evolución", sinala o comunicado.

Os dous porteiros repartíronse a titularidade nos últimos anos | Foto: RC Celta

A lesión de Rubén é delicada e podería telo apartado varias semanas dos terreos de xogo. O 'Gato de Catoira', inédito este curso, ten ante si a oportunidade que estaba a esperar para reivindicarse e demostrar que segue tendo esa habilidade felina que o tivo gardando o arco de Balaídos durante a última década. No pasado Nadal parecía que sería o seu último curso en Vigo e que deixaría o club dos seus amores e agora, case un ano despois, podería entrar no ano novo como o seteiro titular do cadro celtiña. Hora de rabuñar cada minuto sobre o verde. O Gato afía as garras.