O discurso de VOX que relaciona inmigración e paro contribúe a que Ribeira sexa o seu primeiro bastión galego

Galicia é unha das catro comunidades onde o avance da dereita radical en España non se traduciu en escanos. Os 114.834 votantes galegos de VOX non serviron para lograr diputados. Con todo, as eleccións mostran que o voto nalgúns pobos -como Ribeira, Abadín ou Becerreá- inclínase paulatinamente cara á ultradereita, que ten unha oportunidade nas autonómicas de 2020 para lograr a representación nunha das poucas autonomías que aínda se lle resiste.

Santiago Abascal, líder de VOX

"Estamos para quedarnos porque hai un votante fiel que se identifica plenamente connosco e co traballo dos nosos deputados". Así o anunciou hai semanas para este medio Miguel Anxo Fernández, cabeza de lista de VOX na Coruña na carreira por unha cadeira de brazos no Congreso dos Deputados. Fernández, aínda que satisfeito polos resultados da súa forza que logrou 52 escanos e subiu en case un millón de votos en apenas seis meses, quedou o domingo co mel nos beizos ao ver como os 8.000 votos que o separaron do BNG son os que lle privaron de ir a Madrid.

O CLUB DOS CATRO

Ese puñado de votos son os que mantiveron a Galicia no grupo das Comunidades Autónomas polas que VOX non ten representantes. Con Galicia están País Vasco, A Rioxa e Navarra como comunidades nas que VOX segue sendo un partido cuxo impacto aínda non é relevante na política autonómica.

En todo caso, o porcentaxe de votos de Galicia atópase nun termo medio; cun 7,8%, superada polo 11,45% co que contou a forza de extrema dereita na Rioxa, pero lonxe do 5,62% e 2,43% de navarros e vascos.

Porcentaxe de voto a VOX  por municipios en Galicia e no conxunto da peninsula e as illas | MAPBOX

Nese sentido, Feijóo está de parabéns ao ser dos poucos conservadores que logrou lastrar o auxe de VOX, ademais de ser o único goberno autonómico do PP onde nin a formación de Santiago Abascal nin Cidadáns lograron rabuñarlle escanos aos populares, que se manteñen fortes e como única opción forte para a dereita galega.

O presidente da Xunta sacou peito o domingo despois da "remontada" protagonizada polo seu partido. "Se convencemos aos votantes de VOX e Cidadáns de que a única alternativa para que non goberne a esquerda, o nacionalismo e o populismo é seguir concentrando votos, haberá bos resultados nas autonómicas", remarcou o líder dos populares galegos.

A GALICIA DE VOX

En case unha vintena de municipios galegos VOX logrou un 10% de apoio, destacando por encima de todos eles Abadín, Becerreá e Ribeira. En Abadín e Becerreá VOX alzouse como terceira forza cunhas sorprendentes porcentaxes do 12,89% e o 13,42% de apoio respectivamente, moi por encima do 7,99% e 9,66% do pasado abril. Con todo, ese apoio, aínda que significativo, só se traduce  en 142 e 196 votos para a candidatura de Santiago Abascal, xa que ningún dos dous municipios lucenses supera os 3.000 habitantes. Cabe destacar que en ambas as localidades a abstención aumentou considerablemente, coa metade dos votantes de Abadín sen achegarse ao colexio electoral.

Mitin de VOX na Coruña

Mención á parte merece Ribeira. O municipio é o máis grande da comarca do Barbanza, con máis de 27.000 veciños e veciñas. En seis meses, VOX conseguiu o apoio de case 700 ribeirenses máis, o que o leva a contar cun apoio próximo ao 14% dos votantes do municipio. 1.747 votantes que converteron á opción de ultradereita na terceira máis votada da localidade, por encima de En Común ou BNG e moi por encima de Cidadáns, que agora sumou 665 votos fronte os 2.121 de abril, pasando practicamente ao ostracismo.

Pero, que pode levar a unha localidade do noroeste galego cunha industria orientada ao sector pesqueiro e conserveiro a ser a colmea da ultradereita en Galicia? Cales son as preocupacións principais dos veciños de Ribeira para abrazar desa forma o programa de VOX? Só fai falta botar unha ollada superficial ás propostas de VOX e á demografía do municipio arousán para ver que hai dous aspectos que converxen: a inmigración e o paro.

INMIGRACIÓN E DESEMPREGO

Ribeira é, cos seus pouco máis de 27.000 habitantes, un crisol cultural, polo menos en termos galegos. Na vila, segundo os datos do Instituto Galego de Estatística correspondentes a 2018, residen exactamente 1.000 estranxeiros.  Supón un 3,7% da poboación, fronte ao 3,4% da media galega.

Se desagregamos estes datos, podemos comprobar que a poboación marroquí é a que rexistra unha maior presenza en Ribeira, con 285 veciños. En Galicia a poboación marroquí representa un 0,25%, mentres que en Ribeira hai un 1,05%, máis de catro veces máis. Unha poboación que, a pesar de estar baseada en Galicia desde hai anos, non abandonou os seus costumes e cultura, algo que manifestan moitas mulleres vestindo o hiyab pola rúa.

Por ese motivo podemos atopar a 'Comunidade Islámica de Riveira', que conta cunha mesquita desde o ano 2008 onde os fieis ao Islam poden profesar a súa relixión libremente. Ademais dun templo para musulmáns -o único en todo o Barbanza- en Ribeira tamén podemos atopar catro igrexas evangélicas ou un 'Salón do Reino das Testemuñas Cristiás de Jehová'. Esta mestura de distintas relixións e culturas parece non ser aceptada por unha parte dos veciños da localidade, que xa no pasado mostraron o seu descontento pola apertura da mesquita.

Doutra banda, Ribeira tamén conta desde hai moitos anos cunha importante comunidade  xitana, unha das máis numerosas de Galicia. A comunidade xitana de Ribeira procede na súa maioría da extinta Iugoslavia e, aínda que a súa integración no día a día da cidade foi paulatina, aínda existen grupos que se moven na marxinalidade e son mirados con desconfianza por parte dalgúns veciños.

O programa de VOX fai énfase na deportación de inmigrantes sen papeis e propón máis trabas para conseguir a nacionalidade e a residencia. Os nacionalistas relacionan a inmigración con competencia deselal -reclaman actuar contra as "mafias do comercio rueiro"- e o mercado de traballo -pois din que "a inmigración afrontarase atendendo ás necesidades da economía"-. 

O paro é, precisamente, a principal preocupación dos galegos segundo o últimos estudo do CIS, mentres que os "problemas de índole económica" ocupan o terceiro escalafón, só por detrás dos políticos. A inmigración, en cambio, aparece na última parte da táboa do CIS. 

En Ribeira, segundo o último informe do SEPE correspondente ao mes de setembro, hai 1.156 persoas paradas. O discurso de VOX, ese que denuncia que o resto de partidos  "abandonaron aos españois para dar prioridade aos inmigrantes" , ou que as prestacións sociais só están destinadas a estranxeiros, ten  unha boa caixa de resonancia en Ribeira.

Outros aspectos, como a crise catalá, a reforma da lei electoral, o aborto ou as relacións de España coa Unión Europea, aínda que non son temas baladís, non parecen ser o que lle quita o soño aos veciños nin o primeiro que lle vén á mente aos ribeirenses nada máis levantarse pola mañá, na maioría dos casos para vivir do mar, que parece ser o único que, de momento, non fai distincións en Ribeira e trata a todos coa mesma implacabilidade.