Naturgy logra conectar todos os seus parques a tempo de acceder ás primas reafirmando a súa aposta polas renovables

As empresas que lograron primas na última poxa eólica estatal  teñen que ter os seus parques en marcha antes de 2020 para poder acceder ás axudas. Este é o motivo do 'boom' eólico que vive o país. Naturgy, un dos principais operadores en Galicia, anuncia que é o primeiro en conectalos todos á rede eléctrica.

Naturgy obtivo un beneficio neto de 901 millóns de euros nos nove primeiros meses do ano, fronte ás perdas de 3.040 millóns de euros que reportou no mesmo período do exercicio pasado como resultado da deterioración de case 4.900 millóns de euros apuntado polo grupo pola depreciación que levou a cabo dos seus activos, especialmente os de xeración en España. A compañía sinala que "supera as previsións do mercado cos seus resultados ata setembro".

Construción do Parque Eólico da Vacariza, cuxo montaxe finalizou este verán, un dos promovidos por Naturgy recentemente en Galicia

Excluíndo os elementos non recorrentes, o beneficio neto ordinario do grupo foi de 991 millóns de euros, o que supón un incremento do 13% respecto a setembro do ano pasado, impulsado pola evolución dos negocios fóra de España e a mellora nas súas operacións, informou a compañía.

O resultado bruto de explotación (Ebitda) de Naturgy a peche de setembro situouse nos 3.290 millóns de euros, un 10,6% máis. En termos ordinarios, alcanzou os 3.397 millóns de euros, un 4,6% máis.

ESCENARIO MÁIS ADVERSO QUE O ANO PASADO

A enerxética, que destaca que estes resultados déronse a pesar da falta de crecemento dos negocios regulados e a retardación dos negocios liberalizados nun escenario enerxético máis adverso que o do exercicio anterior, bate así as previsións do consenso dos analistas, que estimaban un Ebitda media reportada de 3.267 millóns de euros e un beneficio neto de 893 millóns de euros.

O grupo presidido por Francisco Reynés, que con estes resultados avanza na consecución do seu plan estratéxico 2018-2022, tamén acelerou neste primeiros nove meses de ano a súa aposta polas renovables , cun investimento próximo aos 400 millóns de euros, o maior da súa historia.

XA TEN OS SEUS PARQUES CONECTADOS

Así, no terceiro trimestre do ano Naturgy destacou que se converteu na primeira empresa en conectar á rede a totalidade da potencia adxudicada (250 MW) na última poxa fotovoltaica de España, o que lle permitirá cobrar as primas.

No seu conxunto, investiu máis de 1.100 millóns de euros no período de xaneiro a setembro, que se destinaron principalmente ao desenvolvemento de proxectos renovables, onde destacan os 290 MW de proxectos solares e eólicos postos en operación en España no período. A capacidade instalada no país ascende xa a preto de 1,5 gigavatios (GW), un 25% máis.

Ao peche do pasado mes de setembro, a débeda neta da empresa situábase nos 15.133 millóns de euros, 176 millóns de euros menos a pesar dos investimentos acometidos e os seus compromisos de remuneración ao accionista.

OPTIMIZACIÓN DA SÚA CARTEIRA
Por outra banda, Naturgy progresou na optimización da súa carteira de negocios, reinvestindo os recursos xerados pola venda da chilena Transemel para facerse co control conxunto de Medgaz coa compra dun 34,05% a Mubadala por 445 millóns de euros.

Reynés valorou que, no seu conxunto, a repartición do control de Medgaz con Sonatrach supón unha operación "moi atractiva" para Naturgy, "tanto por tratarse dun activo de infraestruturas estratéxico, onde incrementamos a nosa posición de control notablemente, como polos termos financeiros alcanzados no acordo, que supoñen un prezo atractivo para uns dividendos estables e predicibles a longo prazo que cumpren cos nosos criterios de xeración de valor para o accionista".

Así mesmo, dentro dese roteiro marcado polo seu plan estratéxico, o grupo acelerou o seu plan de eficiencias, que ten un obxectivo de 500 millóns anuais de redución de custos en 2022, e espera alcanzar a peche de 2019 como mínimo 150 millóns de euros, fronte á previsión inicial de 100 millóns de euros.

DIVIDENDO
Respecto a a retribución aos accionistas, o consello de administración aprobou o segundo dividendo a conta de resultados deste ano de 0,473 euros por acción, que se distribuirá o próximo 12 de novembro. Este dividendo súmase ao programa de recompra de accións, en liña co compromiso adquirido no seu plan estratéxico.

Ademais, durante este terceiro trimestre a enerxética completou a amortización de 16,567 millóns de accións propias equivalentes ao 1,7% do capital, co correspondente incremento do beneficio por acción.