As fotos de Feijóo con "a banda de cuatreros" de Pemex e a súa relación coa crise de Barreiras acenden o Parlamento
800 empregados das auxiliares do naval de Vigo van camiño do paro nos próximos días, ao reducir Barreiras a súa actividade ao mínimo imprescindible. Este é o primeiro impacto concreto da crise do maior estaleiro privado de España, en preconcurso de acreeedores. Crise que chega seis anos despois de que a Xunta a venda a PEMEX como solución para o sector. Onte o Bloque lembroulle a Alberto Nuñez Feijóo a súa responsabilidade, en particular as súas fotos con Emilo Lozoya Austin, ex-directivo de PEMEX hoxe prófugo da xustiza.
Lozoya Austin está acusado de tres delitos, incluído a cobranza de subornos. O actual presidente de México, López Obradoiro, aludiu a corrupción e sobrecustos nas súas críticas aos contratos de PEMEX con estaleiros españois.
O ex-director xeral de PEMEX na época do anterior goberno de Pena Nieto é un dos que negociou con Feijóo o desembarco mexicano en Galicia . Prófugo, cunha orde de busca internacional, a súa nai foi detida en Alemaña este verán e el defendeu a súa inocencia nas redes sociais, mentres segue escapado:
Á opinión pública. pic.twitter.com/XIJSpgt8JW
— Emilio Lozoya Austin (@EmilioLozoyaAus) June 11, 2019
DEBATE NO PARLAMENTO ESTE MARTES
O deputado do BNG Luís Bará esixiu este martes "responsabilidades" ao presidente da Xunta, Alberto Núñez Feijóo, e ao conselleiro de Economía, Francisco Conde, pola situación do estaleiro Hijos de J. Barreiras, en preconcurso de acredores, do que responsabiliza ao "fracaso da operación Pemex".
O certo é que o futuro de Barreiras pende dun fío. A nova dirección de Pemex, á vez que investiga ducias de casos de suposta corrupción dos seus antecesores, está a negociar co fondo voitre Oaktree a venda da maioría do accionariado de Barreiras.
Oaktree é un dos investidores en Ritz-Carlton. A famosa cadea hostaleira é outro dos atrapados na lea, pois nas bancadas está un cruceiro de luxo a medio construír que acumula meses de atrasos e un sobrecusto xa de 50 millóns sobre os 250 orzados.
No medio están uns 1.000 traballadores de empresas auxiliares, que son a maioría dos obreiros, pois Barreiras a penas ten uns 150 operarios propios. Estas compañías empezaron a despedilos.
O estaleiro, mentres tenta saír á boia cun preconcurso de acredores, reduciu a actividade ao mínimo. Oaktree espera que a Xunta e o Goberno de España láncenlle un cable, avalando novos créditos que permitan finalizar o cruceiro de luxo nas bancadas e outro similar xa comprometido. O eventual apoio da Xunta estará, sen dúbida, condicionado por como evolucione a polémica ao redor de Lozoya Austin, a quen relacionóuselle recentemente cunha investigación da UCO sobre o suposto pago de comisións por parte de López Madrid, ex-directivo de OHL e Ferrogloble, en México.
O BNG ALERTA DAS "AMIZADES PERIGOSAS" DE FEIJÓO
Na súa intervención no pleno do Parlamento, nunha pregunta que comezou pasadas as 21,00 horas -tras iniciarse a sesión ás 10,00 horas deste martes--, Bará cargou contra Feijóo e Conde por facerse "fotos" con "prófugos da xustiza mexicana", "a banda de cuatreros" de Pemex. "Estas eran as amizades perigosas!", clamou.
Feijóo con Emilio Lozoya na sede de Pemex nunha foto difundida no seu día pola Xunta de Galicia
CONDE DEFENDE ATRAER A PEMEX A GALICIA
En resposta, o conselleiro de Economía, Francisco Conde, dixo que o Parlamento non se merece o "despropósito" de intervención de Bará. De tal forma, pediu "un pouco de respecto ao Goberno e a este Parlamento, e un pouco de prudencia nas súas afirmacións".Tras asegurar que "a responsabilidade" de ter unha débeda de 200 millóns "será do estaleiro", Conde comprometeu o apoio da Xunta aos traballadores. "Se este goberno non promovese que Pemex investise en Galicia non estariamos a falar de Barreiras", resolveu.
Escribe o teu comentario