Colectivos de Vigo mobilízanse toda a semana antes da folga polo clima do venres
Recollida de de lixo no río Lagares , concentracións de estudantes, permacultura e a gran manifestación do venres son algunhas das actividades programadas desde os Fridays for Future de Vigo.
Unha pasada mobilización do colectivo nunha imaxe da súa Twitter
Desde este luns Vigo organiza unha serie de actividades reivindicativas que culminarán con "unha das maiores mobilizacións a favor do clima a nivel mundial" o 27 de setembro.
O obxectivo desta convocatoria é "esixir a declaración, por parte das diferentes institucións, do estado de emerxencia climática e a adopción urxente de diferentes medidas para combater e contrarrestar os efectos do cambio climático".
Así o manifestaron varias organizacións, entre as que destacan 'Fridays for Future' de Vigo e o Movemento Galego polo Clima, que conta co apoio de máis de 60 asociacións galegas que secundarán a iniciativa "axuntando as súas forzas".
AXENDA E MANIFESTACIÓN EN VENRES
Desta maneira, a partir do luns haberá actividades de visibilización do problema climático, presentación de alternativas ao sistema de produción actual, actos pola soberanía alimentaria, concentración durante a mañá do 27S e a manifestación polo clima o mesmo día ás 20,00 horas desde Vía Norte. Antes, ás 11 horas haberá concetración estudantil fronte aos centros escolares para reclamar a declaración da Emerxencia Climáticia. O mércores haberá actividades sobre permacultura no Ecolectivo de Monte dá Serra de Castrellos ás 17:30 horas.
Para finalizar, o domingo as entidades prevén realizar unha recollida de lixo no río Lagares ás 11,00 horas como broche da semana mundial polo clima.
Escribe o teu comentario