Amancio Ortega pasa dos críticos e realiza a súa maior doazón á Xunta: 90 millóns para centros de maiores

|

Podemos xerou unha enorme polémica na última campaña ao atacar ao dono de Inditex polas súas doazóns ao sistema público de saúde, acusándoo de branquear as súas prácticas fiscais. O magnate non se deixa intimidar e hoxe a súa fundación anuncia que construirá e equipará sete novas residencias de anciáns en Galicia, con capacidade para 900 persoas.


A Fundación Amancio Ortega (FAO) financiará con 90 millóns de euros a construción e equipamento das sete novas residencias de maiores proxectadas pola Xunta nas cidades galegas e que, en total, sumarán 900 novas prazas para a rede pública de Galicia. Ademais, permitirán crear máis de 800 empregos directos.


O PP cre que as críticas de Podemos ás doazóns de Amancio Ortega demostran o seu

Amancio Ortega


Así quedou subscrito este venres coa firma dun convenio de colaboración en Santiago de Compostela, nun acto no que participaron, entre outros, a vicepresidenta primeira da Fundación, Flora Pérez Marcote; o presidente da Xunta, Alberto Núñez Feijóo; e a conselleira de Política Social, Fabiola García.

Tras a firma do convenio, Feijóo agradeceu o mecenado da Fundación, que permite "descargar ás arcas públicas dun importante investimento, cuxa contía seguirá encadrada no ámbito social, pero poderá destinarse a outros fins".

Así, destacou que actos deste tipo evidencian que "o servizo público" está en "todas as capas" da sociedade galega. De feito, subliñou que, con esta "doazón" desméntese " a esa minoría que afirma que as empresas non invisten no ámbito social para enrocarse no falso mito dun sector privado inhumano".

Lonxe diso, o presidente defendeu que "a chave do futuro está na colaboración leal entre o sector público e o sector privado". O Executivo autonómico remarca que este é o "maior proxecto singular da historia da entidade" e fontes da Fundación confirmaron a Europa Press que é a maior "doazón" realizada á Xunta de Galicia na súa historia.

Unha doazón formalizada, en palabras de Fabiola García, quen tamén resaltou a importancia do mecenado na loita, "a cambio de nada e a favor de todos os galegos".

900 PRAZAS E 800 EMPREGOS
A Xunta poñerá os terreos ao dispor da entidade, que asumirá, cun orzamento inicial estimado de 90 millóns, os gastos de construción e o equipamento completo dos sete novos centros de atención integral a persoas maiores. Finalizados, a chave dos centros farase chegar á Xunta, que sumará á súa rede 900 novas prazas residenciais.

Delas, 150 funcionarán en Vigo e outras tantas na Coruña; mentres as cidades de Ourense, Lugo, Santiago, Pontevedra e Ferrol contarán con 120 en cada caso. O seu funcionamento diario permitirá a creación de máis de 800 empregos directos no sector da atención aos maiores.

"VOCACIÓN ALTRUÍSTA"
Feijóo eloxiou o compromiso social da Fundación, que xa financiou a construción de seis escolas infantís públicas, dous centros interxeracionais en Ourense e Arteixo, e a nova sede da Real Institución Benéfico-Social Padre Rubinos na Coruña. En clave estatal, a Fundación tamén doou máis de 300 millóns para renovar equipos oncolóxicos, entre outras actuacións.

A nova colaboración entre a FAO e a Xunta, insistiu Feijóo, supón "unha mostra da vocación altruísta que latexa no seo da sociedade galega, tanto no sector público como nas súas entidades privadas".

ESTUDO ELSA URQUIJO
O presidente apuntou que as sete futuras residencias ofrecerán unha atención asistencial con vocación de excelencia, que as levará a ser as mellores de Europa, nuns edificios deseñados polo estudo galego Elsa Urquijo Arquitectos.

"A atención ás persoas maiores de Galicia dá un paso máis na procura da excelencia e demostra que está preparada para abordar os retos da década de 2020", subliñou.

Pola súa banda, o vicepresidente executivo da Fundación, José Arnau, agradeceu en nome da institución a confianza depositada en ela, e resaltou a importancia de colaborar co maior esforzo posible para mellorar a calidade de vida dos maiores.

A conselleira de Política Social ratificou que a Xunta manterá as súas liñas de traballo en defensa do impulso demográfico e de velar por mellorar a atención aos maiores. A modo de exemplo, lembrou que, no últimos dez anos a comunidade incrementou un 42 por cento o número de prazas públicas para maiores, ata chegar ás 8.000.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress