Así é a repartición de competencias na nova Deputación de Lugo, con Tomé á fronte de obras

Tras unha convulsa lexislatura, o novo equipo de goberno socialista, en coalición co BNG, que lidera o alcalde de Monforte ponse como obxectivo reactivar o rural

O presidente da Deputación, José Tomé, presentou este venres a composición do novo goberno provincial para o próximos catro anos, no que o titular da institución se reserva as áreas de Xestión Territorial, que inclúe as materias de vías e obras, parque móbil e unidade de proxectos.

Arroupado polos deputados do Grupo Socialista na corporación provincial, Tomé apuntou que o novo goberno aspira a "ser o máis útil posible á provincia". O vindeiro martes, o PSOE levará a proposta ao pleno de xullo para a súa aprobación.

O tamén alcalde de Monforte asumirá as áreas de goberno que xa desempeñou no anterior mandato como rexedor monfortino, algo co que, segundo as súas palabras, pretende implicarse "de forma directa na xestión para impulsar e garantir o reequilibrio social e territorial".

Pola súa banda, a portavoz socialista na institución provincial, Pilar García Porto, encargarase da área de Réxime Interior, Promoción do Territorio e Turismo, mentres que o deputado Pablo Rivera levará Promoción Económica e Social. A alcaldesa de Trabada, Mayra García, farase cargo de Economía, Recadación, Facenda e Especial de Contas e a rexedora de Viveiro, María Loureiro, asume Muller e Igualdade.

Completan a lista a concelleira lucense Ana González Abelleira, que levará Formación, Educación e Economía do Coñecemento e os alcaldes de Pedrafita do Cebreiro, José Luis Raposo --Medio Ambiente--; Ribeira de Piquín, Roberto Fernández --Recursos Sustentables--; Castroverde, José María Arias --Cooperación e Asistencia aos concellos-- e o de Xermade, Roberto García --Participación Cidadá--.

"EQUIPO SÓLIDO"
Para Tomé, trátase de "un equipo sólido, cunha longa experiencia na gobernanza e xestión da administración pública". "Sobre todo, temos moita iniciativa e ganas de traballar pola provincia con honestidade, eficiencia, diálogo, transparencia e proximidade á cidadanía", resaltou.

Con respecto ás áreas que xestionará o BNG, Tomçe sinalou que serán "os propios deputados nacionalistas os que darán conta da súa organización interna por respecto á autonomía de xestión de cada grupo que conforma o Goberno". En todo caso lembrou que asumirán as competencias de Deportes, Artesanía e Deseño, Memoria Histórica, Medio Rural, Mar, Mocidade, Cultura, Patrimonio Histórico e Normalización Lingüística.

Finalmente, precisou que a xunta de goberno estará formada por 9 deputados: Maite Ferreiro, Pilar García Porto, Pablo Rivera, Mayra García, Roberto Fernández, José María Arias, José Luis Raposo, Mónica Freire e o propio Tomé. Mantense a periodicidade e a hora das sesións ordinarias do pleno e da xunta de goberno, o último martes de cada mes e todos os venres, respectivamente.