O PP veta limitar os eucaliptos para evitar incendios como o de Dodro e Rianxo

Os conservadores alegan que a Lei de Montes xa establece unhas franxas e que, ademais, a Xunta sacará unha liña de axudas para plantar árbores frondosas

O PP votou en contra este mércores no Parlamento galego dunha iniciativa do BNG, apoiada polo resto da oposición, que buscaba establecer criterios máximos para acoutar árbores en función da especie. O seu fin era apostar por unha ordenación en mosaico --con variedade de cultivos e vexetación que sirvan como devasas naturais-- para evitar que se repitan "catástrofes" como o recente incendio de Dodro e Rianxo (A Coruña), que arrasou máis dun milleiro de hectáreas.

Na súa intervención na comisión de Agricultura, o deputado do BNG Xosé Luís Rivas, Mini, remarcou que das 1.165 hectáreas ardidas nese incendio, un total de 900 foron de eucalipto, unha masa "monoespecífica", polo que avisa de que a única prevención é apostar pola ordenación.

Por iso, o deputado nacionalista reclama á Consellería do Medio Rural "coller o touro polos cornos", pois é "máis necesaria que nunca" unha ordenación ante a "brutalidade da forestación que se está facendo actualmente". Aquí, remítese aos estudos sobre o valor das masas descontinuas e a necesidade de "confinar" a especies pirófitas como o eucalipto en superficies "limitadas".

O deputado de En Marea Davide Rodríguez coincidiu en que esta medida é "necesaria", mentres Raúl Fernández (PSdeG) apelou a aprobar medidas de "moito calado" como esta para axudar a combater o cambio climático, xa que alerta de que en 2050 na provincia de Ourense choverá a metade que agora.

En cambio, o deputado do PP Moisés Blanco Paradelo xustificou a negativa do seu grupo en que non son partidarios de facer modificacións lexislativas por "casuísticas particulares" como o incendio de Dodro e Rianxo. Ademais, resalta que as distancias que deben gardar os eucalipto xa están reguladas na lei de montes, á vez que a Consellería traballa nun novo decreto para o fomento das frondosas para a prevención de incendios.

Na súa quenda de réplica, Mini ironizou con que "houbo centenares de casos particulares" na vaga de incendios de 2017 en Galicia, á vez que asegurou que o Bloque insistirá nesta iniciativa ata conseguir a súa aprobación no futuro.

Eucaliptos ardendo no incendio de Boiro