Estes son os gañadores dos premios Martín Códax da música

Baiuca, Bala e Tanxugueiras foron algúns dos proxectos gañadores na sexta edición dos Martín Códax da música, na que Carlos Barruso recolleu o premio honorífico

Bala recollendo o seu premio

A cerimonia celebrouse no Pazo da Cultura de Pontevedra ante máis de 700 asistentes, e será emitida o sábado 11 de maio ás 22,45 na TVG2 e o domingo a media noite na TVG1. Promovidos pola Asociación Músicas Ao Vivo, a gala contou con Quico Cadaval como director artístico.

Os galardóns recaeron en Igloo (no apartado pop/indie), Bala (rock), Nave (metal), Xosé Miguélez (jazz/músicas improvisadas), Wöyza (músicas urbanas), Adrián Saavedra (clásica/contemporánea), Tanxugueiras (música tradicional e folk) Marcos Teira (músicas do mundo), Xoán Curiel e A Banda do Verán (música infantil) e Baiuca (electrónica).

Tamén foron para Banda Crebinsky (reggae/ska/mestizaxe), Os Satélites (orquestras/grupos/música de verbena), Carmen Rey (blues/funk/soul),   Ejazz (coros e grupos vocais), Festival de Pardiñas (festivais),  Contrabajo Club (salas), Diario Cultural (espazos de comunicación músical) e Carlos Barruso (honorífico).

Os premios foron entregados por representantes de distintos ámbitos do sector musical como Tony Lomba, Rosa Cedrón e Ton Risco, aos 18 proxectos premiados, que levaron a casa os Melómanos e Melómanas creadas polo escultor e músico Víctor Lorenzo a golpe de motoserra.

Nesta edición inscribíronse un total de 442 proxectos (391 grupos, 11 salas, 25 festivais e 15 espazos de comunicación). No seu discurso de clausura, a presidenta de MAV, Sonia Lebedynski, destacou o traballo feito pola directiva para cumprir o obxectivo final do certame de "favorecer a visibilidade da música galega en cada unha das súas fórmulas tan diversas".

Reclamou "espazos de promoción e difusión para a música galega nos medios públicos, que deben ser independentes, veraces e críticos; e libres de inxerencias do poder".

Neste sentido, tamén solicitou da administración que "os grandes investimentos deixen de sufragar infraestruturas e destínense a garantir unha presenza musical galega representativa"; e pediu ás salas e festivais que "fagan un esforzo por escoitar e programar música galega".