Caballero publica anuncios ensalzando o seu labor a pesar de estar prohibido en época electoral
O alcalde de Vigo xa foi apercibido pola Xunta Electoral, pero volve ás andadas promocionando a súa imaxe mediante un anuncio a toda páxina en determinada cabeceira local
A coalición Son En Común, rexistrada para as eleccións municipais de maio e cuxa marca en Vigo é Marea, denunciou ante a Xunta Electoral de Zona a inserción dunha páxina de publicidade nun medio local por parte do goberno socialista de Abel Caballero, ao considerar que vulnera a normativa aplicable en época electoral.
Así, Marea refírese a un anuncio a toda páxina publicado no 'Faro de Vigo' deste domingo, no que, baixo o epígrafe 'Vigo, municipio polideportivo', poden verse tres imaxes do rexedor rodeado de mozos deportistas de varias disciplinas. Ademais, as imaxes van acompañadas do texto "O Concello programa os mellores eventos para a promoción das modalidades".
No escrito remitido á Xunta Electoral de Zona faise constar que na publicación dese anuncio resáltanse "supostas actuacións do goberno local, con especial énfase na presenza gráfica do alcalde de Vigo".
"Consideramos que esta publicidade vulnera a normativa legal de difusión de actuacións institucionais durante a convocatoria electoral municipal", apuntou Marea.
O QUE MARCA A LEI
Este grupo lembrou que a lei orgánica de réxime electoral (LOREG) establece que, ata que non empece a campaña electoral, non se pode facer propaganda mediante carteis ou insercións en prensa e outros medios, "non podendo xustificarse ditas actuacións polo exercicio das actividades ordinarias dos partidos, coalicións ou federacións".
Do mesmo xeito, a lei recolle que, ata a celebración dos comicios, están prohibidos os actos organizados por poderes públicos que aludan a realizacións ou logros obtidos.
CABALLERO XA FOI APERCIBIDO
Precisamente, a vulneración desta 'neutralidade' levou hai unhas semanas á Xunta Electoral a apercibir tanto ao alcalde como á presidenta da Deputación de Pontevedra, Carmela Silva, que entón foron denunciados polo PP --partido que anunciou que tamén denunciará a publicación desa inserción publicitaria do domingo--.
Escribe o teu comentario