Os policías necesitan máis medios para combater a súa taxa de suicidios, que duplica a media

Sete axentes de policía suicidáronse en Galicia en último lustro e centos causaron baixa por cuestións psicolóxicas debido, entre outros factores, ao a presión que sofren no seu día a día

Rolda de prensa do SUP na sede de CC.OO. en Santiago

O Sindicato Unificado de Policía reclamou este venres que se poña en marcha canto antes un equipo multidisciplinar e un protocolo para prestar asistencia psicolóxica aos axentes e previr a elevada cifra de suicidios no corpo, que practicamente duplica en taxa á da poboación en xeral.

Así o explicou o secretario xeral do SUP en Galicia, Roberto González, que participou xunto con outros compañeiros nunha rolda de prensa en Santiago para informar, entre outras cuestións, da evolución do programa Vive CNP, posto en marcha por eles fai catro anos nalgúns puntos da xeografía española, entre eles Galicia, para servir de apoio psicolóxico aos axentes que o necesiten.

Neste período, destacou, o equipo de Vive CNP atendeu a 50 axentes de distintos puntos do país e planea a súa extensión a novas comunidades, como Madrid ou Andalucía, cubrindo un "baleiro" no apoio psicosocial dos policías.

450 BAIXAS DE MEDIA
Así, Roberto González expresou a preocupación do SUP por este "drama" que afecta os axentes de Policía, un colectivo no que a taxa de suicidios supera o 15%, fronte ao 7,76 do conxunto da poboación, e que rexistra unha media de 450 baixas anuais por causas psicolóxicas.

En concreto, segundo datos do sindicato, desde o ano 2000 suicidáronse en España 162 axentes, catro deles en 2019. Desde 2015 foron 48 os suicidios rexistrados no corpo, dos que sete tiveron lugar en Galicia.

Ao factor psicolóxico, para o que os axentes non contan cun sistema de avaliación ou protección, denuncia o SUP, súmase o feito de traballar con armas, dado que precisamente este é o método máis habitual. Nesta situación, o suicidio é precisamente a primeira causa de morte non natural dos axentes, por encima dos falecidos en acto de servizo.

PROTOCOLO E EQUIPO MULTIDISCIPLINAR
A nivel nacional, hai pouco máis dun ano, constituíuse unha mesa de traballo para crear un protocolo de prevención da conduta suicida no corpo que, entre outros elementos, incluiría un equipo multidisciplinar ao que os axentes puidesen acudir en caso de necesitalo e que exercese un control da saúde mental dos policías.

Tras varias reunións, o SUP denunciou que o proceso se "paralizou" durante o último trimestre do ano pasado, e aínda non se convocaron novas reunións, polo que esixiron que se "reactive".

Para os profesionais, a tensión e os factores emocionais son "os grandes esquecidos" do traballo dos axentes, que non contan con ferramentas como avaliacións psicosociais periódicas ou métodos de vixilancia da saúde mental.

Por iso, esixen a posta en marcha deste tipo de medidas, que preveñan novos suicidios, así como elementos como a asistencia telefónica aos axentes que o necesiten ou o apoio profesional adecuado. Este equipo de prevención e seguimento, que apostan porque estea inicialmente composto por sete persoas, tería "un custo baixo", destacaron.