Por que a Xunta non tomba a declaración de impacto ambiental da mina de Touro?

En Marea acusa á Xunta de ir da man de Atalaya Minning e o Goberno respóndelle que unha cousa é a canteira actual e outra o plan para reabrir a explotación de cobre 

O deputado de En Marea Antón Sánchez acusou á Xunta de ser "cómplice" da contaminación da mina de Touro-O Pino (A Coruña) ao non emitir unha avaliación de impacto ambiental negativa ao proxecto mineiro que se pretende implantar na zona, á vez que lle pediu que dea "carpetazo" ao proxecto que promove na zona Cobre San Rafael.

ARGUMENTOS DE ANTÓN SÁNCHEZ

Ante estas acusacións esgrimidas no pleno do Parlamento de Galicia, a conselleira de Infraestruturas e Mobilidade, Ethel Vázquez, replica que as leis "están para cumprirse" e que os técnicos encargados fan informes "con legalidade".

Así respondeu despois de que o deputado de En Marea acusase ao PP de "levar tolerando 30 anos a contaminación na contorna", apuntando ademais que, froito das choivas de xaneiro, produciuse un desbordamento de materiais da balsa de Bama que chegaron a un afluente do río Ulla.

"É unha ameaza para a vida das persoas, para a saúde e para o medio ambiente. Vostedes foron cómplices absolutos da actividade delituosa desta empresa", apuntou Sánchez.

A CONSELLEIRA CONFÍA NA NOVA MINA

Deste xeito, Ethel Vázquez quixo deixar claro as "diferenzas" entre a antiga mina de Touro e o que será a actividade futura de Cobre San Rafael na zona. Respecto desta última, a conselleira asegurou que "velarán polo cumprimento da lei, pola calidade das augas e por minimizar as afeccións á contorna".

Tamén aproveitou para arremeter contra o goberno local de Santiago, ao que "lle importa ben pouco" a calidade das augas do río Sar, xa que o proxecto da depuradora está atrasado "sine die".