(Vídeo) Armados ata os dentes, así entraron os gardas civís nun piso de Lugo para liberar a unha menor que finalmente dixo que non fora secuestrada

A Garda Civil difunde o vídeo da "Operación Luluba". Enarborando armas automáticas e fortemente protexidos, unha ducia de axentes asaltou esta semana un piso na Rúa Amizade de Lugo.

Buscaban a unha menor de 15 anos, presuntamente secuestrada. E atopárona, en perfectas condicións, en compañía dos seus supostos raptores.

A moza procede de Olmedo, en Valladolid. Os detidos lucenses son pai e fillo. O mozo, de 18 anos, e o seu proxenitor acudiron a Castela a pedir a man da moza. 

Segundo a versión da benemérita, tres días despois da petición foron ao Instituto onde estudaba a menor e metérona nun coche. Os feitos foron denunciados polo pai da nena e polo director do centro de ensino.

A Garda Civil detivo aos dous baróns en Lugo; pero a historia virou ao chegar ao xulgado. O pai foi posto en liberdade inmediatamente, pero encarcerouse provisionalmente ao mozo. 

Agora ben, a menor declarou que non a secuestraron, senón que fuxiu coa súa parella, que a recolleu en coche e levouna ata un autobús. En consecuencia, o rapaz quedou en liberdade, segundo informa  El Progreso. A menor foi recollida polo seu pai, de volta a Valladolid.