Empresas de ambulancias alertan que poden deixar de pagar os soldos

|

Reafirman a súa proposta de baixar un 10% o actual convenio "debido á delicada situación económica que atravesan"


Protesta de traballadores de ambulancias en Santiago.


A "falta de solucións" por parte da Consellería de Sanidade na reunión que mantiveron este xoves cos representantes da Federación Galega de Empresarios de Ambulancias (Fegam) e "a incerteza" sobre un novo concurso para o transporte sanitario urxente levou a manifestar á patronal para manifestar aos traballadores que "non garanten" o pago das nóminas "máis aló de marzo".

Ademais, nun comunicado a patronal manifestou que esta situación levou aos empresarios do transporte sanitario a manter a súa petición de rebaixa dun 10% na mesa de negociación do novo convenio colectivo do transporte sanitario en Galicia "debido á delicada situación económica que atravesan".

A situación actual das empresas, tanto no ámbito económico como xurídico -poida que algunhas non concorran a un novo concurso ou que se vexan obrigadas a entrar en concurso de acredores por motivos económicos-, advirte a Fegam, "imposibilita a negociación dun novo convenio laboral no que, por outra banda, os traballadores demandan unha subida, en cómputo global, do 30%".

"Desta forma, e ante a imposibilidade de achegar posturas, a mesa de negociación pospúxose sine die", resaltou a Fegam, que abundou que así llo fixeron saber os representantes da patronal aos traballadores na reunión celebrada este venres en Relacións Laborais, á que asistiron delegados de CC.OO., UXT e CIG, na que tamén lles comunicaron a "imposibilidade de garantir o pago das nóminas máis aló do 31 de marzo".

"O axustado do importe co que saíron a concurso os lotes do 061, unido a unha serie de gastos sobrevindos aos que tiveron que facer fronte as concesionarias do transporte urxente en Galicia, levaron ás empresas a unha situación insustentable economicamente", insistiu a Fegam.

É por iso que no mes de novembro de 2017 solicitouse á Administración a "inaplicación temporal" do convenio colectivo, lembrou a Fegam, con base nas perdas económicas que estaban a sufrir.

RECURSO
Agora, os servizos xurídicos da Fegam preparan o recurso que presentarán "de forma inminente", avanzou, ante o Tribunal Superior de Xustiza de Galicia (TSXG), "solicitando que a Administración resolva".

Galicia conta con 109 ambulancias do 061 repartidas por todo o territorio, cuns 872 traballadores que prestan servizo nas mesmas, segundo datos da Fegam.

Na actualidade, e tras o último concurso convocado pola Fundación Pública Urxencias Sanitarias, os empresarios rexistran perdas anuais de máis de cinco millóns de euros, "a pesar do cal mantiveron unha porcentaxe de subida salarial do 1% desde finais de 2015, data na que concluíu o último convenio", concluíu a Fegam.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress