Os PACs galegos anuncian unha folga indefinida a partir de xaneiro

A Plataforma ‘PACs en pé De Guerra’ anunciou a medida xunto coa concentración que realizará o vindeiro xoves 27 de decembro ante o Parlamento de Galicia.

Manifestación de 'PACs en pé De Guerra'

Tras meses de conflito, os PACs, por medio da plataforma ‘PACs en pé De Guerra’, anunciaron que a partir de xaneiro o colectivo iniciará unha folga indefinida, como último recurso para poder lograr as súas reivindicacións. “Durante todos estes meses fomos ninguneados nas diversas reunións mantidas, e as que nunca houbo o menor indicio e negociación por parte do SERGAS”, lamentan nun comunicado, deixando claro que a paciencia dos profesionais acabouse.

Con todo, tamén anuncian que, debido ás necesidades que provocan estas datas, farán un parón “na folga mantida ata agora, pois somos conscientes das dificultades asistenciais que se producen en datas como nas que nos atopamos”, aínda que a partir do 7 de xaneiro retomarana de forma indefinida.

Ademais, denuncian que o SERGAS, “tras dous meses de folga”, non convocou “ ao seu comité para falar cos traballadores” nin realizou “nin unha soa proposta de calado neste tempo”.

Doutra banda, xunto co anuncio da folga indefinida, os PACs convocaron unha concentración o próximo 27 de decembro ás 10:30 horas ante as portas do Parlamento galego, onde a esa hora celebrarase a comisión sobre a situación da Sanidade Pública en Galicia. “Unha das nosas principais reivindicacións é a dotación de recurso humanos, que non foron revisados desde a creación destes dispositivos, a pesar dos cambios sociodemográficos sufridos desde entón”, explican na nota, onde tamén fan referencia ao suceso ocorrido no PAC da Estrada, un feito que tampouco fixo reaccionar ao SERGAS.