Sánchez rectifica anunciando orzamentos para xaneiro

O Consello de Ministros aprobará o proxecto de Orzamentos Xerais do Estado para 2019 no mes de xaneiro e remitirao o Congreso, anunciou este martes o presidente do Goberno, Pedro Sánchez.

Nunha entrevista en Telecinco, Sánchez confirmou que, a pesar do desastre dos socialistas nas eleccións andaluzas, o seu Goberno segue determinado a continuar a folla de ruta que se fixou tras a moción de censura.

QUE HAI TRAS ESTE CAMBIO DE GUIÓN?

Sánchez pasou en 24 horas de darse un ano de prazo para presentar os orzamentos para anunciar que estes levarían ao Congreso de forma inmediata. Tras este volantazo do presidente do Goberno están os resultados das eleccións andaluzas, que aínda están a ser dixeridos polas direccións dos partidos políticos nacionais.

Por unha banda, Sánchez pode presentar neste momento os orzamentos para presionar coa pantasma de Vox a ERC e PDeCat, dos cales depende que as contas públicas saian adiante.

Aínda que o presidente do Goberno, se finalmente non saen aprobadas as súas contas, podería defender que tentou ata o último minuto entenderse co independentismo polo ben do conxunto do país e anunciar que non ten máis opcións que adiantar as xerais.

Así, cumpriríase aquel "superdomingo" do que falou Ábalos o pasado 19 de novembro e que en todo momento foi unha opción contemplada polo Executivo.