Ledicia Costas enfronta a corvos e unicornios na súa última novela

Ledicia Costas | Imaxe: Eugenio Álvarez

A escritora de literatura xuvenil Ledicia Costas volve aos andeis das librerías coa súa última novela, La Balada de los Unicornios. O libro, que lle valeu o Premio Lazarillo de Creación Literaria en 2017, está ambientado no Londres victoriano e conta a historia de Ágata McLeod, unha das mellores alumnas da Escola de Artefactos e Oficios.

Anaya Infantil e Xuvenil publica en castelán a obra da prolífica autora viguesa, que xa conta coa súa edición en galego, A Balada dos Unicornios, na embaixadora do grupo en Galicia, a editorial Xerais. Cunha marcada temática steampunk, en palabras da editora Anaya, o libro de Costas é unha viaxe chea de misterio e intriga "con Jack o destripador pisando os talóns dos nosos protagonistas no seu intento por salvar ao máxico León, o seu gran amigo". 

Esta novela de ciencia e fantasía a protagonista terá que viaxar á orixe do mundo nunha loita sen cuartel que enfronta corvos e unicornios. 

Ledicia Costas, nacida en Vigo en 1979, debutou coa novela Unha Estrela no Vento en 1999 e desde entón publicou numerosos libros xuvenís de historias de bruxas, pantasmas e mortos. Galardoada con diversos recoñecementos como o Premio Melín de Literatura Infantil, o Premio Fervenzas Literarias ou o Premio Xosé Neira Vilas, o galardón Lazarillo de Creación Literaria por A Balada dos Unicornios converteuna na única autora galega en gañalo dúas veces. Costas forma parte da directiva de Gálix, a Asociación Galega do Libro Infantil e Xuvenil e dos colectivo Poetas da Hostia.