O persoal de Atento maniféstase en contra dos "despedimentos a contagotas" e as sancións

Outra protesta do persoal de Atento

O persoal de Atento na Coruña secundaron este luns unha nova xornada de protestas nun calendario de mobilizacións que levan a cabo desde o pasado 28 de maio en protesta polas sancións e o despedimento de persoal, segundo denuncian.

"Estamos cunha explotación laboral que cada vez vai a máis", sinalou a Europa Press unha das representantes do comité de empresa, Chus Rodríguez. Sobre os motivos das protestas, sinalou que están a producirse "despedimentos a contagotas" e que se está exercendo "moita presión" sobre os traballadores, con imposición de "sancións" tamén.

Na xornada deste luns, o comité de empresa convocou unha concentración ás 12,00 horas ante o centro de traballo, unha mobilización que se repetirá tamén ás 18,00 horas.

Para o 10 de setembro, convocaron unha manifestación, que sairá ás 18,00 horas desde a sede da empresa co lema 'Atento: 20 anos en loita contra a explotación laboral'.

Desde os sindicatos, denuncian tamén que a empresa non dá mostras "de querer atender" unhas reivindicacións que cualifican de "xustas e razoables". Por iso, afirman que seguirán loitando por un traballo "digno e saudable".