A xuíza ordena precintar todo o entarimado do náutico "por motivos de seguridade"
Séguense por un presunto delito de lesións imprudentes, sen prexuízo de ulteriores cualificacións ao longo da instrución
Tras o accidente ocorrido o pasado domingo durante o concerto de Rels B en O Marisquiño, o Xulgado de Instrución nº3 de Vigo fíxose cargo da investigación. Segundo explica o Tribunal Superior de Xustiza de Galicia (TSXG), as dilixencias previas incoadas tras recibir un oficio dando conta do sucedido e un informe fotográfico da Policía nacional, "séguense por un presunto delito de lesións imprudentes, sen prexuízo de ulteriores cualificacións ao longo da instrución".
O Xulgado decidiu que se abra unha peza separada por cada unha das persoas prexudicadas "para unha mellor e máis áxil tramitación da causa". En primeiro lugar, a Maxistrada titular do xulgado decretou o precinto de todo o entarimado da zona do náutico "por motivos de seguridade".
A xuíza acordou que as dilixencias necesarias para esclarecer os feitos, entre as que se inclúen a realización de periciais e a solicitude de diferente documentación a Concello, Porto e organización, sexan levadas a cabo pola policía científica e a policía judicial.
Escribe o teu comentario