Activada a alerta laranxa varias zonas por temperaturas máximas de ata 40 graos
Os servizos de emerxencia do 112 activaron nas zonas do Miño de Ourense e Pontevedra a alerta laranxa, xa que a Axencia Estatal de Meteoroloxía (Aemet) prevé que alcancen temperaturas máximas de 40 e 38 graos, respectivamente, o que supón unha lixeira baixada con respecto ao venres, cando se activou a alerta vermella nas devanditas zonas.
Os elevados valores comezarán a darse nas primeiras horas do mediodía deste sábado e prolongaranse ata últimas horas da tarde, segundo anunciou Emerxencia Galicia 112.
Durante esta noite, no sur da provincia de Pontevedra as temperaturas mínimas estiveron por encima dos 25 graos. Por exemplo, no municipio de Oia rexistrouse ás 02,30 da madrugada 32,3 graos, un dos maiores valores alcanzados nas últimas horas, segundo datos de Meteogalicia.
Ademais, noutros moitos puntos do resto da comunidade chegáronse a superar durante a noite os 20 graos, aínda que nalgunhas zonas das comunidades de Ourense, Lugo e A Coruña as temperaturas mínimas foron igual ou menores de 15 graos esta mañá.
E é que a tendencia deste sábado é que as temperaturas tanto mínimas como máximas descendan lixeiramente, aínda que as máximas seguirán sendo superiores a 35 graos en moitos puntos da Comunidade, segundo apuntou Meteogalicia.
Escribe o teu comentario