Aparecen 2.000 pezas na escavación dun castro galego

A escavación do xacemento galaico-romano de O Facho de Donón en Cangas (Pontevedra) continuará ata finais de 2018 tras a firma do convenio de colaboración entre a Deputación Provincial, o concello e a comunidade de montes de O Hío, por un investimento de 257.462 euros. 

A presidenta da Deputación, Carmela Silva, fixo un balance "espectacular" da campaña arqueolóxica iniciada en maio na croa do castro, onde se recuperaron unhas 2.000 pezas.

O convenio, aprobado na Xunta de Goberno do organismo provincial, enmárcase no protocolo subscrito co Ministerio de Fomento para a posta en valor de varios xacementos. Carmela Silva xustificou estas actuacións en base á implantación dun "modelo de turismo cultural e desestacionalizado" ao redor de aspectos como a cultura, o patrimonio, a paisaxe ou o deporte.

No ámbito dos 1.300 metros cadrados onde se desenvolveu a recente intervención acháronse catro moedas romanas do século IV a.C. e un obxecto de ferro que está en fase de estudo para a súa identificación, ademais de ánforas romanas e cerámicas castrexas.

DINAMIZACIÓN
"O obxectivo é crear unha área arqueolóxica homoxénea e restaurada para o seu aproveitamento turístico", explicou Carmela Silva, para a "dinamización da zona, recuperando un novo espazo de gran valor patrimonial, cultural e tradicional", engadiu.

Así, os traballos actuais céntranse na restauración do terreo escavado e a preparación dun novo sector onde se ampliará a prospección. A falta de que finalicen estes labores, tanto en O Facho como en Santa Trega, na Guarda, a presidenta da Deputación precisou que xa están executadas e finalizadas as actuacións comprometidas no convenio con Fomento.

No que respecta ao Ministerio, redactáronse e entregado á Dirección Xeral de Patrimonio os proxectos de musealización para os castros de Toiriz en Silleda, Alobre en Vilagarcía, Subidá en Marín e Igrexa Vella en Valga, á espera da autorización autonómica.

Tamén están en fase de redacción vos proxectos de musealización dos castros da Lanzada en Sanxenxo, Penalba en Campo Lameiro, Mercado dos Mouros en Valga, Adro Lanuxe no Grove, Alto dos Cubos en Tui e Cruz do Castro en Cotobade.

Ademais, están pendentes de definir por parte de Fomento os prazos de adxudicación e execución dos proxectos de musealización redactados e impulsar os que faltan, correspondentes a Taboadexa nas Neves, Troña en Ponteareas, Trega na Guarda, Facho en Cangas, Porta de Arcos en Rodeiro, Cabeciña en Oia e Castrolandín en Cuntis.