O eucalipto, árbore pantasma na presentación do novo Plan Forestal

|

A Xunta de Galicia presentou hoxe o seu Plan Forestal. Durante os 10 minutos que o presidente dedicou a presentalo non nomeou nin unha soa vez a palabra eucalipto. Cando tomou o estrado a conselleira de Medio Rural na rolda de prensa tras o Consello da Xunta tampouco nomeou este arbol. De feito, a palabra "eucalipto" nin aparece na nota de prensa de presentación do plan, a pesar de ser o activo económico máis importante do monte galego e foco dunha gran polémica pola súa relación cos incendios.


Consello da Xunta do 19 de xullo de 2018


Non foi ata que Galiciapress preguntou pola previsión de máis superficie desta especie cando Ángeles Vázquez nomeou ao eucalipto e admitiu que a superficie prevista aumentará das 307.000 hectáreas actuais ata as 332.000.


DE CADA DEZ NOVAS HECTÁREAS DE ÁBROLES, TRES SERÁN DE EUCALIPTO

Son 25.000 hectáreas máis sobre o aumento de 80.000 hectáreas previsto para o total de masa arborada. É dicir, de cada dez novas hectáreas plantadas, tres serán de eucalipto. 


Isto a pesar de que no borrador de Plan Forestal, a propia Xunta admitía que o eucalipto é un dos factores que explican as contínuas vagas de incendios. E a pesar de que o Goberno tamén admitía que as previsións do anterior plan forestal para o eucalipto foron violadas, cun crecemento exponencial. E a pesar de que Medio Rural incide que o Plan busca, precisamente, limitar o problema dos lumes que arrasan Galicia unha e outra vez.


A XUNTA APUNTA QUE Os PROPIETARIOS O QUEREN

Aínda así, Vázquez defendeu as especies de "crecemento rápido" e defendeu a necesidade de xestionar o monte "sen demonizar" ningunha planta. Tamén deixou caer que a expansión do ecualipto débese en parte a que os paisanos apostan por el, o cal é rigorosamente certo, pois o 96% do monte galego é de propiedade privada ou das mancomunidades de montes.


Da moratoria que barallou a Xunta hai meses, para prohibir a expansión de eucalipto en certos concellos do interior, non hai nin rastro. Moito menos da moratoria xeral que impulsou Portugal o ano pasado.


UNHA ÁRBORE QUE DÁ ALGO DE  DIÑEIRO Ao RURAL

Por que a Xunta segue sen abordar o problema do eucalipto? O goberno atópase atrapado entre dous polos. Por unha banda, gran parte do electorado urbano é crítico co evidente abuso dos eucaliptais, con miles de hectáreas plantas en lugares -como labradíos- prohibidos por Lei, e que consideran unha tara paisaxística e pirófila. 


Doutra banda, os eucaliptos achegan unha renda, pequena pero significativa, a miles de propietarios do rural, onde o PP ten o seu gran caladoiro de votos.  Ademais, son a materia prima de ENCE, a empresa da celulosa de Pontevedra en cuxo consello de administración senta un ex-conselleiro, Carlos do Álamo, e unha ex-ministra, Isabel Touciño, os do PP.



Brigadas eucalipto barbanza verdegaia 2

Brigadas desecualiptizadoras de Verdegaia


A Xunta optou por un Plan que recolle un incremento do 8% para eucaliptos, ata unhas 332.000 hectáreas; pero que tamén propón aumentar piñeiros, castiñeiros e caducifolias e potenciar subsectores como o da castaña e o mel ecolóxico. Nestes aspectos, máis vendibles para a opinión pública, é onde o Goberno pon a énfase, afastando o foco do eucalipto, máis agora que entramos na época de máximo risco de incendios.


OS SINDICATOS AGRARIOS TAMPOUCO PIDEN UNHA MORATORIA

O aprobado hoxe no Consello da Xunta aínda ten que pasar o filtro do Parlamento. Pasarao, porque o PP ten maioría absoluta e porque os ecoloxistas seguen sendo os únicos abertamiente críticos coa especie.


A industria e os madeireiros, loxicamente, non queiren oír falar de moratorias. Os sindicatos agrarios, conscientes de que miles dos seus afiliados plántanos en zonas ilegais, nadan entre dúas augas, por unha banda piden límites e ordenación de esta especie pero tampouco apostan por máis prohibicións, como moito que se fagan cumprir unhas normas que se seguen violando á vista de todos.


UN CUARTO DE SÉCULO SEN PLAN PARA O MONTE

O anterior Plan Forestal data de 1992. Son 26 anos sen un documento actualizado para xestionar o monte galego. Ángeles Vázquez prometeu que isto non sucederá outra vez, actualizando o Plan cada cinco anos.


Váquez alega que o texto busca unha repartición "equilibrada" do territorio forestal, "sen demonizar ningunha especie".

Así as cousas, o 52% do territorio forestal galego destinarase a produción de madeira, o 23% a frondosas actóctonas e castiñeiras e o 24% a espazos abertos e pastos, segundo resume Europa Press.

OS DATOS DE ESPECIES, SEN ALEGACIÓNS
Este e o resto de datos por especies foron presentados polo director xeral de Ordenación Forestal, Tomás Fernández-Couto, en abril na comisión parlamentaria que se creou para estudar a problemática dos incendios forestais tras a onda do pasado outubro, que arrasou unhas 50.000 hectáreas en apenas un fin de semana e cobrouse catro vidas.

Esta planificación por especies non recibiu ningunha alegación, segundo resaltaron fontes da consellería consultadas por Europa Press. Como o documento atópase en trámite de información pública, aínda poderá recibir achegas.

O modelo para os próximos 20 anos, que cada goberno poderá revisar "cada cinco anos", segundo resaltou o presidente galego, Alberto Núñez Feijóo, tamén propón incrementar os piñeirais, en concreto ata case 530.000 hectáreas (desde unhas 433.000 hectáreas actuais), de modo que supoñan un 26% da superficie forestal.

Os bosques mixtos (con piñeiros, eucaliptos e frondosas), que actualmente ocupan unhas 253.000 hectáreas, deberán diminuír, segundo o plan revisado, ata unhas 198.000 hectáreas, algo máis do 9% da superficie actual.

Para as caducifolias tamén prevé un aumento, das 366.000 hectáreas actuais ata máis de 400.000 (o 19,75% do monte); do mesmo xeito que para os castiñeiros, que dentro de 20 anos terían que acaparar un 3,52% do monte, con máis de 71.000 hectáreas (actualmente son unhas 45.500 hectáreas).

O documento establece para o arboledo ralo, matogueiras e pastos, que supoñen hoxe en día 622.720 hectáreas, unha rebaixa ata 496.831 hectáreas, ou, o que é o mesmo, o 24,47% do monte.

A intención do Goberno galego é ter aprobado este documento a finais de 2018 ou a principios de 2019, "dependendo do número de achegas".

EN BUSCA DO "MÁXIMO CONSENSO"
Ademais, Núñez Feijóo subliñou que incorporará, "no seu caso", as conclusións que elabore a comisión de incendios. Tanto el como a titular de Medio Rural fixeron fincapé na vontade de buscar o "máximo consenso" cos distintos axentes implicados e con toda a sociedade.

Así mesmo, informaron de que as medidas que contempla o plan supoñen 112 millóns de euros en 2018 e planifícase un incremento sostido anual do 1%.

O documento incorpora figuras como a do sivicultor activo, inclúe as directrices de xestión forestal en espazos protexidos, fomenta as modalidades xurídicas de agrupación dos montes e leva a cabo, segundo a Xunta, unha promoción "decidida" da cultura forestal.

A maiores, prevé a creación do observatorio forestal de Galicia e dun sistema integrado estatístico sobre esta materia no ámbito autonómico. No ámbito normativo, propón o desenvolvemento e a simplificación da lexislación autonómica en vigor.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress