O Breogán de Lugo xa é 100% ACB

Ao Breogán de Lugo non lle pasará como ao Club Ourense Baloncesto, que despois de ascender na cancha abortou o cambio de categoría ao fracasar na imprescindible consecución de músculo económico que esixe a primeira liga de baloncesto de España.

Así, a propia ACB confirmou este luns que o Club Baloncesto Breogán SAD (Cafés Candelas Breogán) e o Bàsquet Manresa SAD (BAXI Manresa) xa son oficialmente membros da competición, ao superar os requisitos.

Ambos os clubs conseguiran praza de ascenso desde a LEB Oro na tempada 2017-18 e presentado a documentación e cantidades necesarias dentro do prazo para a súa inscrición na competición, sendo esta analizada favorablemente polos auditores e a propia ACB. 

A liga destaca que todos "os clubs votaron de forma unánime a súa entrada na Asociación".

Unha gran noticia para Lugo despois dun eterno calvario na LEB. O Breo é un histórico deste deporte,on a posición 12º na táboa histórica con 760 encontros, produto de 156 en Liga Nacional e 604 en ACB. 

Acabouse a travesía, despois de 12 anos do seu descenso deportivo.