"Irregularidades" nas oposicións de Educación da Xunta

A Unión Sindical de Docentes de Galicia (USDG) trasladou á Consellería de Cultura, Educación e Ordenación Universitaria as queixas sobre as "incidencias e irregularidades" detectadas por parte dos aspirantes nas oposicións de Educación.

Os incidentes aos que alude a formación sindical, segundo indicou este domingo nunha nota de prensa, van desde as "altas temperaturas" dos espazos "con 140 persoas", ata a "falta de vixilancia" dos membros do tribunal, a insuficiencia de aulas, o mobiliario "inadecuado" e os "exames mal formulados".

Por mor de todas as queixas recibidas, USDG solicitou á Xunta a eliminación dalgunha das probas por "presentar erros" e a repetición doutras debido á "falta de vixilancia" dos tribunais.

"OBSOLESCENCIA" DO SISTEMA

Neste sentido, o sindicato destacou a "obsolescencia" dos exames, xa que "non reflicten as capacidades dos opositores" e "discrimina" aos traballadores substitutos e interinos.

Do mesmo xeito, reclama un "sistema de acceso" que "integre as vidas" dos opositores, que valore "as habilidades reais" requiridas para a profesión e que permita ás persoas sen experiencia ser avaliadas de forma "transparente e obxectiva", así como "medios suficientes" por parte da Consellería para implementar estas iniciativas.

Ademais, a dirección xeral do sindicato tachou de "escabechina" o proceso de oposición deste ano, xa que "é moi sospeitoso" que se deu "case o mesmo número de aprobados que de prazas".

Respecto diso, a unión sindical alude ás "prácticas de modificación de notas", constatadas en 2009 en Castela e León, e en base a este precedente levou á Consellería un recurso potestativo "para que isto non ocorra" en Galicia, porque "se xoga coa vida das persoas que puxeron esforzos, tempo e diñeiro" en prepararse para un exame.