"Goma 2 para dar a benvida aos peregrinos"

|

Fotocamino


Aos demoledores informes da Xunta de Galicia difundidos pola asociación ecoloxista Adega acerca dos efectos ambientais da mina de Touro-O Pino hai que sumarlle os danos culturais e económicos que traerían á comunidade. O Sindicato Labrego Galego (SLG) acaba de facer un chamamento á sociedade galega para que mobilícese contra o proxecto mineiro ante a ameaza que supón par una da principais fonte de riqueza cultural e económica: o turismo e o Camiño de Santiago. 


A organización lembrou nun comunicado que a mina de Touro "xa forma parte da paisaxe que actualmente contemplan os peregrinos e peregrinas a partir de Salceda". Isto implicaría para as e os camiñantes, "case 200.000 persoas que percorren cada ano estas etapas finais do Camiño Francés", atoparse cunha "circulación permanente" de maquinaria pesada moi preto do camiño, "cos residuos, contaminación e po en suspensión" que xeran. 


Impacto mina en Lavacolla e Camiu00f1ou

Imaxe: Sindicato Labrego Galego


Así mesmo, o SLG advirte das "constantes" explosións con fortes detonantes, como Arfo e Goma 2. "O proxecto da empresa estima que realizaranse 2.074 explosións nas que se utilizarán ao redor de 20.000 toneladas de explosivos que xerarán tremores, nubes de po e mesmo ameazarán con lanzar cascallos que poñerán en perigo a vida das persoas nas inmediacións", explica no comunicado. 


Doutra banda, o proxecto non só afectaría a este itinerario do Camiño, senón que, segundo explica o SLG, a concesión da mina limita directamente co aeroporto e as pistas de Lavacolla. "É que ninguén ve o perigo de realizar voaduras con explosivos á beira do principal aeroporto de Galicia?", pregúntanse no sindicato. A terminal compostelá tivo máis de 21.500 voos e máis de dous millóns e medio de pasaxeiros e pasaxeiras en 2017. 


O sindicato tacha duramente a actuación da Administración neste proxecto: "calquera gobernante cun mínimo de sentido de país prohibiría fulminantemente unha explotación mineira destas proporcións e tan lesiva para o medio ambiente, a economía e a vida de miles de galegos e galegas", e anima á poboación para "facerse escoitar" na manifestación do domingo 10 en Compostela. 


Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress