Marcha en solidariedade cos enfermos de fibromialxia
A Marcha Solidaria pola Fibromialxia contará co apoio de SOS Sanidade Pública e outras asociacións de enfermos
Con motivo do Día Internacional da Fibromialxia, este sábado 12 de maio A Coruña acolle unha marcha solidaria por esta enfermidade, organizada pola Asociación Coruñesa de Fibromialxia, Síndrome de Fatiga Crónica e Sensibilidade Química Múltiple (ACOFIFA).
Ademais, a fachada da Deputación Provincial da Coruña e a Torre de Hércules iluminaranse con luces moradas emblemáticas en homenaxe aos enfermos.
PROGRAMA DE ACTOS
Baixo o lema “Dóenos; non estamos a finxir”, ACOFIFA dará comezo ás 11.30 horas aos actos reivindicativos do Día Internacional da Fibromialxia, brindando información sobre a fibromialxia e a súa sintomatología aos cidadáns de Coruña. Ás 12.00 horas a presidenta de ACOFIFA, Bibiana Pérez, lerá un Manifesto que resume as reivindicacións da Asociación tanto a nivel social como de saúde pública. A continuación, intervirá a deputada provincial de Benestar Social, Ánxela Franco, e pechará o acto, o alcalde da Coruña, Xulio Ferreiro.
A organización espera un gran número de persoas acoden con camisetas moradas a Marcha Solidaria, que estará apoiada polo alcalde de Sada, Benito Portela, SOS Sanidade Pública, así como por outras asociacións de enfermos e persoal do Centro Cívico San Diego onde ACOFIFA ten a sede. A Marcha Solidaria partirá do Obelisco cara á rúa Real, pasando por Rego de Auga, ata alcanzar a Praza de María Pita.
CAMISETAS GRATIS PARA Os PARTICIPANTES
A organización informa que para esta reivindicación as persoas interesadas poden reservar a súa camiseta solidaria -gratis- no email acofifaasoc@gmail.com. Así mesmo, dispoñerase de botellas de auga para os enfermos e resto de participantes para este pequeno percorrido, por cortesía da compañía alimentaria Gadisa.
Escribe o teu comentario