Sabotaxe no hospital de Monforte, no que segue a folga

Os traballadores do Hospital de Monforte do SERGAS están convocados a un paro parcial, de dous días á semana, desde finais de abril. Os asalariados protestan contra a sobrecarga de traballo e "o desmantelamento do centro sanitario e das consecuencias que isto vai ter na atención ás/aos enfermos da comarca". Convocan CIG, UXT, Comisións Obreiras e SAGAP.

Protesta diante do hospital de Monforte / Paula Vázquez Verao

LATA DE CERVEXA EN MATERIAL CIRÚRXICO

A polémica saltou hai uns días ao descubrirse unha lata de cervexa nunha caixa de material cirúrxico para un quirófano. A Xunta abriu unha investigación e os sindicatos falan dunha acción de sabotaxe, non ao quirófano, senón á propia folga.

A secretaria nacional da CIG-Saúde, María Xosé Abuín , asegura hoxe que “a CIG e o resto de organizacións sindicais do comité de folga foron os primeiros en dirixirse á dirección do centro para que se iniciou unha investigación seria e rigorosa sobre o acontecido cunha lata de cervexa aparecida nunha caixa de material cirúrxico”, así como demandaron que se adoptaron medidas de seguridade “para evitar que se volveu a producir un incidente destas características”.

Outro punto de discrepancia é o seguimento do paro. O Sergas cifrouno nun 5,5% esa semana mentres que o sindicato di que "non só é secundada polo persoal, senón que conta co apoio masivo da poboación". 

Así, os sindicatos seguirán coas mobilizacións, con carácter indefinido, ante "a falta de persoal e do cambio nas súas condicións de traballo".  As dúas plataformas galegas en Defensa da Sanidade Pública e  todos os grupos da oposición en o Parlamento apoian a folga no Hospital de Monforte.